Azərbaycan, Bakı / Trend , müxbir İ.Xəlilova / Azərbaycanın Rabitə və İnformasiya Texnologiyaları Nazirliyi və Dünya Bankı sentyabrın 28-də informasiya texnologiyaları sahəsində layihələrin reallaşması məqsədilə qrant əldə edəcək yeddi təşkilatın adlarını açıqlayacaq, bazar ertəsi Dünya Bankının Bakı nümayəndəliyindən verilən məlumatda belə deyilir. Dünya Bankının kiçik qrantlar proqramı üzrə əməkdaşlıq ilk dəfə olaraq, dövlət orqanı ilə həyata keçirilir.
Dünya Bankı və Rabitə Nazirliyi arasında "İnformasiya cəmiyyəti- inkişafın yeni mərhələsi" proqramı ilə bağlı protokol 2007-ci ilin martında imzalanıb. Nazirliyin iştirak payı 15 min dollar, DB-nin iştirak payı isə 34 min dollar təşkil edir.
İmzalanmış sənəd vətəndaş cəmiyyətinin informasiya texnologiyalarının inkişafında iştirakını stimullaşdıran proqramların vəinformasiya cəmiyyətinin dəstəklənməsini nəzərdə tutur.
Qrant müsabiqəsində Ədliyyə Nazirliyində qeydiyyatdan keçmiş QHT-lər iştirak edə bilər. Müsabiqənin şətrlərinə əsasən, qrantın əldə edilməsi ilə əlaqədar təqdim olunmuş təkliflər yeni informasiya texnologiyalarının tətbiqini, təhsil və səhiyyə sahəsində islahatlar, büdcənin şəffaflığı və korrupsiya əleyhinə mübarizə, gənclərin vətəndaş cəmiyyətinə inteqrasiyası, sosial müdafiə, yoxsulluğun azaldılması və insan hüquqlarının müdafiəsi kimi məsələləri əhat etməlidir.
QHT-lər üçün nəzərdə tutulmuş kiçik qrantlar proqramı Azərbaycanda 2000-ci ildən başlayaraq həyata keçirilir. Bu günə qədər proqram çərçivəsində 53 QHT-yə ümumi məbləği 250 min dollar olan qrant ayrılıb.
