Azərbaycan, Bakı / Trend müxbir S.Babayeva/ Azərbaycanın "Smart Systems Technology" telekommunikasiya şirkəti Azərbaycan Daxili İşlər Nazirliyinin Daxili Qoşunların Baş İdarəsi üçün nəzərdə tutulmuş işləri qismən yerinə yetirib.
Daxili Qoşunların Baş İdarəsinin tələb olunan məntəqələrində lazımi avadanlıqlar quraşdırılıb (konfidesiallıqla əlaqədar olaraq siyahı açıqlanmır), sazlanmış şəbəkənin bir hissəsi təşkil edilib. Digər işlər 2008-ci ildə həyata keçiriləcək.
Şirkətdən verilən məlumata görə, "Smart Systems Technology" qoşunların rabitə sistemində korporativ şəbəkənin yaradılması üçün avadanlıq almalı və şəbəkəyə hər ay xidmət göstərməlidir.
"Smart Systems Technology" "Oracle" korporasiyasının rəsmi tərəfdaşıdır və1999-cu ildə təsis edilib. Şirkət bank və maliyyə fəaliyyətinin kompleks şəkildə avtomatlaşdırılması, mürəkkəb informasiya sistemlərinin işlənib hazırlanması, bank və maliyyə sahələrində konsaltinq xidmətləri, İnternet xidmətlərinin göstərilməsi, müasir kommunikasiya avadanlığının satışı və s. ilə məşğul olur.
