Azərbaycan, Bakı, 03 iyun / Trend , müxbir S.Babayeva/ Carı ilin üçüncü rübində Ümumdünya Poçt İttifaqı köməyi ilə (ÜPİ) "Azerpocht" DM üçün ölkədaxili poçt daşımalarına avtomaşınlar alınacaq. Bu haqda ölkənin Rabitə və İnformasiya Texnologiyaları Nazirliyindən çərşənbə axşamı bildirilib.
"ÜPİ avtomaşınların alınmasını nəzərdə tutan layihəni təsdiq edib, sadəcə, tenderin həyata keçirilməsi məsələsi qalıb", - deyə nazirlikdən bildirilib.
Hazırda "Azerpocht" Dövlət Müəssisəsinin bazasında təxminən 15 avtomaşın var. Onlar Bakı-Gəncə-Bakı, Bakı-Qəbələ-Bakı, Bakı-Horadiz-Bakı marşrutları üzrə poçt daşımaları və Gəncə-Qazax-Gəncə, Qəbələ-Balakən-Qəbələ köməkçi marşrutları üzrə istifadə olunur.
Nazirlikdən qeyd edirlər ki, "Azerpocht" İB bazasında olan avtomaşınların çoxu istismar üçün köhnəlib və yeni avtomaşınların alınması daşımaların səmərəliliyini artıracaq, onların çatdırılma müddətini qısaldacaq.
Mənbənin sözlərinə görə, ümumilikdə 5 avtomaşın alınacaq.
Layihənin dəyəri $180 min təşkil edir, bu məbləğin 50 min dolları Koreya poçt administrasiyasının qrant maliyyə yardımı, məbləğin yerdə qalan hissəsi isə, ÜPİ tərəfindən 1999-cu ildə yaradılan poçt xidməti keyfiyyətinin yüksəldilməsi üzrə xüsusi fondun və Azərbaycan Rabitə Nazirliyinin payına düşür.
Anoloji layihə nəticəsində, 2005-ci ilin dekabrında Rabitə Nazirliyi tərəfindən "Azerpocht" DM üçün dəyəri təxminən $138 min olan yeddi avtomaşın alınıb.