Azərbaycan, Bakı, 06 noyabr/ Trend , müxbir İ.Xəlilova/ Azərbaycanın Rabitə və İnformasiya Texnologiyaları Nazirliyi "2009-2012-ci illərə "Elektron Azərbaycan"" Dövlət Proqramının hazırlanmasını başa çatdırıb, - rabitə nazirinin müavini İltimas Məmmədov cümə axşamı bildirib.
Nazir müavinin sözlərinə görə, yeni proqram (Azərbaycanda artıq "2004-2008-ci illərə "Elektron Azərbaycan"" Dövlət Proqramı realizə edilib) əsas ölkədə elektron cəmiyyətin və "elektron hökumət"in yaradılmasına yönələcək.
Realizəsi cari ildə başa çatan birinci proqramda əsas diqqət müvafiq infrastrukturun yaradılması, fibriooptik rabitə xətlərinin çəkilməsinə yönəldilib. İkinci proqram artıq yaradılmış infrastrukturun bazasında yeni xidmətlərin yaradılmasına yönələcək.
Dövlət Proqramına təxminən 100 layihə daxil
edilib. Layihələrin 30-dan çoxu müxtəlif
dövlət idarələri, qalanları isə Rabitə
Nazirliyi tərəfindən təqdim edilib.
Azərbaycanda rabitə və informasiya texnologiyalarının inkişafı üzrə birinci dövlət proqramı ("Elektron Azərbaycan") prezident İlham Əliyev tərəfindən 2005-ci ilin oktyabrında təsdiq edilib.
Dövlət proqramı iqtisadi-struktur islahatları, rabitə və informasiya texnologiyaları sahəsinin müasirləşdirilməsi və genişləndirilməsi, informasiya cəmiyyətinə keçidin təmin edilməsi üzrə layihələrin hazırlanması və realizəsinə yönəlib. "Elektron Azərbaycan" dövlət proqramının realizəsi üzrə tədbirlər planına iqtisadi-struktur islahatlar, özəlləşdirmə, liberallaşdırma, tənzimləmə, texniki müasirləşdirmə, teleradioyayımın təkmilləşdirilməsi, poçtda islahatlar, informasiya cəmiyyətinə keçid üzrə proqramlar daxildir.
Müəlliflə əlaqə saxlamaq üçün elektron ünvan: [email protected]