Azərbaycan, Bakı, 05 dekabr/ Trend , müxbir S.Babayeva/Azərbaycanda ilk CDMA standartları mobil rabitə operatoru Catel cümə günü Fonex şəbəkəsinin əhatə zonasının genişləndirildiyini elan edib. Şirkətin verdiyi xəbərə görə, indi əhatə zonasına Quba, Qusar və Xaçmaz daxil olur.
Hazırda rabitə operatorunun əhatə dairəsinə Quba, Qusar, Xaçmazla yanaşı, bütün Abşeron yarımadası, o cümlədən Bakı, Sumqayıt, Səngəçal, Ələt, Kürdəmir, Ucar, Şirvan, Göyçay, Mingəçevir, Gəncə, Şəmkir, Ağstafa, Balakən, Dəvəçi, Nabran, Xudat, Lənkəran və Astara da daxildir.
Şirkət, yaxın vaxtlarda Tovuz, Qazax, Ağsu, Masallı, Şəki, Bərdə, 2009-cu ilin ilk yarısında isə, Naxçıvan MR da daxil olmaqla, bütün Azərbaycan ərazisini əhatə dairəsinə almağı planlaşdırır.
1997-ci ildə yaradılmış Catel şirkəti WLL (simsiz abunəçi çıxışı) abunəçiləri üçün FH-CDMA standartında simsiz rabitə xidmətləri, mobil rabitə abunəçiləri üçün 3G CDMA standartında xidmətlər təklif edir.
2004 - ci ilin avqustundan şirkət Azərbaycanda ilk dəfə olaraq Huawei şirkətinin avadanlığının bazasında üçüncü nəsil mobil rabitə texnologiyasını - CDMA 2000 1x-i tətbiq etməyə başlayıb.
2007 - ci ilin aprelində şirkət bazara yeni Fonex ticarət nişanını çıxarıb və bu nişan altında CDMA2000 standartlı mobil rabitə xidmətləri təqdim edir.
Şirkətin CDMA şəbəkəsi abunəçilərinin sayı 15 mini ötür.