Qazaxıstan, Astana, 05 sentyabr / Trend , müxbir K.Konırova /
Dehlidə Qazaxıstan və Hindistan arasında 2009-2011-ci illərdə elm və texnologiya sahəsində əməkdaşlıq üzrə hökumətlərarası proqram imzalanıb. Bu barədə Trend -a Qazaxıstan XİN-nin mətbuat katibi İlyas Ömərov bildirib.
"Bu sənəd biotexnologiya, nanotexnologiya, kosmik tədqiqatlar, informasiya texnologiyaları, bərpa olunan enerji mənbələri və neft-kimya sahəsində birgə elmi layihələrin həyata keçirilməsini nəzərdə tutur", - Ömərov qeyd edib.
Onun məlumatına görə, sənədi Qazaxıstan tərəfindən ölkənin Hindistandakı səfiri Kayrat Umarov, Hindistan tərəfindən isə elm və texnologiyalar nazirinin müavini T.Ramasami imzalayıb.
"Ramasaminin qeyd etdiyi kimi, Hindistan tərəfi iki ölkənin elmi dairələri arasında əlaqələrin genişləndirilməsi üçün əhəmiyyətli imkanlar yaradan elmi-texniki əməkdaşlığın yeni mərhələsinin başlanmasına şaddır", - mətbuat katibi bildirib.
Onun sözlərinə görə, Qazaxıstanın Təhsil və Elm Nazirliyi və Hindistanın Elm və Texnologiyalar Nazirliyi qarşılıqlı elmi mübadilələri, ikitərəfli seminarları və konfransları koordinasiya edəcək, texnoloji innovasiyaların tətbiqinə qarşılıqlı olaraq yardım edəcəklər.
Məqalə müəllifi ilə əlaqə ünvanı: [email protected]
