Azərbaycan, Bakı, 28 dekabr /Trend, müxbir H.Vəliyev/
Özbəkistanın gömrük qaydaları kompüter texnikasının istehsalçısı olan KÜR zavodunun məhsulunun bu ölkəyə ixracı üçün maneə yaradır. Bu barədə Trend-ə çərşənbə axşamı zavoddan bildiriblər.
Söhbət ilkin danışıqları noyabrın 5-7-də Özbəkistanda "Uzeksposentr" sərgi kompleksində keçirilən Azərbaycanın ilk Milli sərgisi çərçivəsində "KomTel" şirkəti ilə aparılan internet-köşklərin ilkin partiyasının tədarükündən gedir.
KÜR-dən dediklərinə görə, Özbəkistan tərəfi ilə danışıqlar "BakuTel-2010" 16-cı Beynəlxalq telekommunikasiya sərgisi çərçivəsində də aparılıb, lakin bu günə bu qurğuların nə vaxt Özbəkistan bazarına çıxacağı barədə razılıq hələ ki əldə edilməyib.
İnternet-köşklərdəki məlumatların düzülüşü sifarişçinin tələbindən asılıdır. Onlar Wi-Fi, WiMAX, LAN və digər portlarla, eləcə də sikkə və əskinasların qəbulu üzrə qurğularla təchiz oluna bilərlər.
Yaxın vaxtlarda KÜR bu köşklərin Bakı şəhərinin ictimai yerlərində də quraşdırılmasına başlamağı planlaşdırır.
Bu gün internet-köşklər Azərbaycanın dövlət və özəl müəssisələrində istifadə olunur. Avtonom qurğular WiMAX texnologiyası üzrə 1 Mbit/s sürətlə yüksəksürətli internet şəbəkəsinə qoşulub. Onlar istifadəçiyə terminalın köməyi ilə əldə etdiyi məlumatı çap etmək imkanı verən printerlərlə təchiz olunublar.