Azərbaycan, Bakı, 18 mart /Trend, müxbir H.Vəliyev/
Azərbaycan Milli Elmlər Akademiyasının İnformasiya Texnologiyaları İnstitutunun (İTİ) Tədris-İnnovasiya Mərkəzi institutun elmi-tədqiqat mərkəzinin alim və mütəxəssislərinin biliklərinin kommersiyalaşdırılmasına kömək edəcək. Bu barədə Trend-ə cümə günü İTİ-nin direktoru Rasim Əliquliyev deyib.
Əliquliyevin sözlərinə görə, Tədris-İnnovasiya Mərkəzi güclü maddi-texniki bazaya malik olmaqla və AzScienceNet elmi kompüter şəbəkəsinə əsaslanmaqla, institutun tərkib hissəsidir.
"Layihədə innovasiya ondan ibarətdir ki, mərkəzin müəllim heyəti təkcə adi müəllimlər deyil, həm də institutun elmi-tədqiqat mərkəzinin əməkdaşları və İT-mütəxəssislərdir. Bu isə mərkəzi digərlərindən çox fərqləndirir. İKT sahəsində bilik və bacarıq səviyyəsinin artırılması məqsədilə bizə artıq əksər dövlət qurumlarından müraciətlər daxil olub. Onlar üçün müvafiq məsafəli təlim təşkil ediləcək. Bu, Azərbaycanda "Elektron hökumət"in formalaşdırılmasında tələblərdən biridir", - Əliquliyev bildirib.
İTİ direktorunun sözlərinə görə, Tədris-İnnovasiya Mərkəzi məsafəli tərdisin aparılması ilə yanaşı, Avropanın aparıcı elmi mərkəzləri ilə videokonfranslar təşkil etməyə imkan verən mərkəzdir.
Apreldə məsafəli təhsilin platforması Naxçıvan Dövlət Universitetində işə salınacaq. Bu, tələbələr üçün mühazirələr təşkil etməklə, onların alimlərlə əlaqəsini təmin edəcək.
Gələcək perspektivdə virtual təhsildən regional səviyyədə digər sosial qruplar da istifadə edə biləcək.