Azərbaycan, Bakı, 14 aprel /Trend, müxbir H.Vəliyev/
Yanvar-mart ayları ərzində təşkilatlara və əhaliyə göstərilən informasiya və rabitə xidmətlərinin həcmi 287,4 milyon manat təşkil edib ki, bu da ötən ilin müvafiq dövr göstəricisindən 23,5 faiz çoxdur. Bu barədə Azərbaycan Dövlət Statistika Komitəsinin məlumatında deyilir.
Ümumi həcmdən 74,2 faiz əhaliyə göstərilən xidmətlərin payına düşür. Bununla yanaşı, alınan gəlirlərin 64,8 faizi mobil rabitə xidmətlərinin payına düşür.
Azərbaycanda mobil rabitə abonentlərinin sayı bu dövrdə 335,4 min nəfər artıb. Aprelin 1-nə olan məlumata görə, respublikada 7,2 milyon aktiv nömrə var ki, bu da ötən ilin eyni dövr göstəricisi ilə müqayisədə 13,6 faiz çoxdur.
Dövlət Statistika Komitəsi ölkədə informasiya-kommunikasiya avadanlığının istehsal sürətinin artdığını da qeyd edir. Beləliklə, iki ayın yekunları üzrə ölkədə kompüter, elektron, optik və elektrik avdanlıqlarının istehsalı 37,4 milyon manat təşkil edib.
Elektrik avadanlıqlarının istehsalında 2,4 dəfə artım qeydə alınıb, eləcə də enerji transformatorlarının istehsalı sahəsində 7,2 dəfə artım olub. Bununla yanaşı, 8,7 milyon manatlıq hazır məhsul anbarlarda yerləşdirilib ki, bu da sənaye müəssisələri məhsullarının ümumi ehtiyatının 3,9 faizini təşkil edib.