Azərbaycan, Bakı, 21 sentyabr /Trend, müxbir H. Vəliyev/
Cari ilin yanvar-avqust aylarında Azərbaycanın mobil qurğular bazarında Finlandiyanın "Nokia" şirkətinin payı 25 faizdən çox azalıb. Trend-in məlumatına görə, bu barədə şənbə günü "Global Stats" Statistika Mərkəzinin yaydığı məlumatda deyilir.
Ötən ilin analoji dövrü ilə müqayisədə azalma təqribən 40 faiz təşkil edib. Buna baxmayaraq, hazırda bu şirkətin telefonları respublika bazarında satış üzrə birinci yeri tutur.
Hesabat dövrü ərzində Azərbaycan mobil qurğular bazarında "Samsung" şirkətinin payı 39,63 faiz artıb.
Ötən ilin analoji dövrü ilə müqayisədə "Samsung" un bazar payı 93,7 faiz artıb. Bu şirkət satış həcmi üzrə ikinci yerdə qərarlaşıb. Koreya şirkətinə Azərbaycanın mobil telefon bazarının 30,86 faizi məxsusdur.
Mobil qurğular bazarında 13,32 faiz payla "Apple" şirkəti son səkkiz ayda təxminən 31,41 faiz artıma nail olub. Üçüncü yerdə olan şirkət mobil qurğular bazarının 13,47 faizini əlində cəmləşdirib.
Bazarda dördüncü yerdə 11,4 faiz payla naməlum istehsalçıların (əsasən Çin istehsalı) qurğuları qərarlaşıb ki, bu ilin əvvəlindən 0,2 faiz, 2012-ci ilin analoji dövründə qeydə alınan göstəricidən isə 13,2 faiz çoxdur.
Daha sonra mobil qurğular bazarında Blackberry - 2,56 faiz, HTC - 2,32 faiz, Sony - 2,17 faiz, Huawei - 0,74 faiz , LG - 0,69 faiz, və Google - 0,31 faiz pay tutur.
