Azərbaycan, Bakı, 4 aprel /Trend/
"Feet on the floor" proqramı çərçivəsində "Microsoft Azerbaijan" şirkətinin əməkdaşları Bakı şəhərinin İT-dükanlarının birində satıcı-məsləhətçi qismində çıxış edərək iş gününün birini ofisdən xaric keçirəcəklər.
Şirkətdən Trend-ə verilən məlumata görə, "Feet on the floor" proqramı bütün dünyada icra olunur və "Microsoft" korporasiyasının bütün ofislərini əhatə edib. Sözügedən proqram çərçivəsində "Microsoft"un əməkdaşları özlərini satıcı-məsləhətçi rolunda sınayırlar. Dükana gələnlər üçün "Windows" platformasında işləyən cihazların seçimi ilə bağlı birbaşa "Microsoft Azerbaijan" şirkətinin əmakdaşlarına müraciət etmək, eyni zamanda, öz fikir və rəylərini bölüşmək imkanı yaradılıb ki, sonradan bu rəylər və fikirlər toplanaraq istehsalçı komandaya göndərilib. Belə ki, proqramın əsas məqsədi əməliyyat sisteminin istifadəçilərindən əks cavab almaqdır, bunu isə ofisdə oturarkən etmək qeyri-mümkündür, deyə "Microsoft Azerbaijan" şirkətinin əməkdaşları bildiriblər.
Şirkətin əməkdaşları ziyarətçilərə yeni innovasiya cihazlarının axınını ifadə edən yeni "Windows 8.1" əməliyyat sisteminin üstünlükləri və imkanları barədə məlumat veriblər. Bu cihazların əksəriyyəti sensor ekranlıdır və müxtəlif qiymət kateqoriyalarında olan hesablama gücünü, xüsusi dizaynı və enerjiyə qənaəti nümayiş etdirir.
"Biz iş günümüzün birini ofisdən kənarda keçirməyi qərarına gəldik ki, bu təşəbbüs çərçivəsində məhsulları peşəkarcasına tanıyan əməkdaşlarımız ziyarətçilərə ətraflı məlumat və məsləhətlər verə bilib. "Microsoft Azerbaijan" şirkətinin komandası potensial müştəriləri ilə görüşdən və onlara "Windows 8.1" platformasının geniş imkanları barədə məlumat verməkdən məmnundur. Belə ki, istehlakçılar üçün keyfiyyətli məhsul və ən yaxşı əməliyyat sisteminin seçimi olduqca vacib məsələdir və biz böyük məmnuniyyətlə satıcı-məsləhətçi qismində çıxış etdik", - deyə "Microsoft Azerbaijan" şirkətinin baş meneceri Rüfət Hacıəlibəyov bildirib.
Qeyd edək ki, sözügedən təşəbbüs çərçivəsində "Microsoft Azerbaijan" şirkəti "Windows 8.1" əməliyyat sistemli son nəsil 4-nüvəli prosessorla təchiz edilmiş yeni yığcam 8 düymluq "Acer Iconia W4" planşeti təqdim edib. Planşetin spesifikasiyasına 2 Qbaytlıq operativ yaddaş, 64 Qbayt daxili yaddaş, həmçinin, yaddaş kartı üçün slot daxildir. Cihazın bortunda məzmunu xarici monitorda əks etdirmək üçün "micro-HDMI" portu, faylların ötürülməsi və enerji toplaması üçün "micro-USB" portu, eyni zamanda, "Wi-Fi" modulları, "Bluetooth 3.0" mövcuddur. Planşetin qalınlığı 10,75 mm, çəkisi isə 415 qram təşkil edir. "Iconia W4" ev və təhsil üçün əvvəlcədən quraşdırılmış "Microsoft Office" paketi ilə ("Microsoft Office Home and Student 2013") tədarük olunur.
"Microsoft" haqqında:
1975-ci ildə təsis edilmiş "Microsoft" korporasiyası proqram təminatı istehsalında dünya lideridir. "Microsoft" korporasiyası geniş çeşidli proqram məhsulları hazırlayır və istehsal edir. Onların arasında stolüstü və şəbəkə əməliyyat sistemləri, müştəri-server mühitləri üçün server tətbiqləri, istifadəçilər üçün stolüstü biznes-tətbiqlər və ofis tətbiqləri, interaktiv proqram və oyunlar, internet şəbəkəsində işləmək üçün vasitələr və hazırlama alətləri. "Microsoft" korporasiyasının məhsulları 80-dən artıq ölkədə satılır, Azərbaycan dili daxil olmaqla 45-dən çox dilə tərcümə edilib və fərdi kompüter platformalarının əksəriyyəti ilə uyğundur.
2005-ci ildən Azərbaycanda fəaliyyət göstərən "Microsoft Azerbaijan" şirkətinin başlıca vəzifəsi - elektron idarəetmə, biznes inzibatçılıq və təhsil sistemi üçün yeni məhsulların tətbiq etməklə Azərbaycanın inkişafına töhfə verməkdir.