Azərbaycan, Bakı, 15 may /Trend, müxbir H.Vəliyev/
"AzeriCard" prosessinq mərkəzi tərəfindən "Delta Telecom"un onlayn-ödəmələr sisteminə qoşulması üzrə bütün işlər müvəffəqiyyətlə başa çatıb. Bu barədə Trend prosessinq mərkəzindən daxil olan məlumatda deyilir.
"Delta Telecom" 2000-ci ildən telekommunikasiya və informasiya texnologiyaları bazarında müvəffəqiyyətlə fəaliyyət göstərən Qafqaz regionunda yeganə aparıcı operatordur. "Delta Telecom" korporativ sifarişçilər, dövlət strukturları, banklar, özəl müəssisələr, 78% Qafqaz İSP-ləri və Azərbaycanda olan bütün İSP-lər üçün komleks şəkildə həllərin tətbiqi, həmçinin istənilən xidmətin keyfiyyətinin artırılması məqsədilə gün ərzində 24 saat fəaliyyət göstərən quraşdırıcı və servis-qəza xidmətləri təşkil edir.
İndi "Delta Telecom"un istifadəçiləri evdən və ya ofisdən çıxmadan, onlayn rejimdə şirkətin xidmətlərini ödəmək imkanı əldə edirlər. Nağdsız ödəməni www.azericard.com saytında yerləşən "AzeriCard" ödəmə səhifəsində aparmaq olar. Ödəmə Visa, Visa Electron, MasterCard və Maestro elektron bank kartları vasitəsilə keçirilir. Elektron bank kartlarının məlumatlarının təhlükəsizliyi 3D Secure sistemi tərəfindən təmin olunur.
