Azərbaycan, Bakı, 3 sentyabr /Trend, müxbir Hüseyn Vəliyev/
Azərbaycanın Rabitə və Yüksək Texnologiyalar Nazirliyinin "Bakı Telefon Rabitəsi" İstehsalat Birliyi Məlumat Sorğu Mərkəzi yaratmağa hazırlaşır. Mərkəzin operatorları 2015-ci ildə Bakıda keçiriləcək Birinci Avropa Oyunlarının qonaq və iştirakçılarının bütün suallarına cavab verəcəklər. Bu barədə çərşənbə günü Trend-ə İB-dən bildiriblər.
Şəhərin infrastrukturu (mədəni mərkəzlər, nəqliyyat, hotellər və s.) haqqında bütün zəruri sorğu məlumatları müxtəlif dillərdə (ingilis, rus, fransız və başqa) təqdim olunacaq.
Bakıda 2015-ci il iyunun 12-dən 28-dək keçiriləcək Birinci Avropa Oyunları bütün qitə üçün həyəcanlandırıcı və texniki cəhətdən mükəmməl təşkil edilmiş idman mənzərəsi olacaq.
Oyunlarda idmançılar 19 idman növü üzrə yarışacaqlar ki, onlardan 16-sı Olimpiya idman növüdür. Yarışlarda bütün Avropadan altı mindən çox atlet iştirak edəcək.