Azərbaycan, Bakı, 1 noyabr /Trend, müxbir Hüseyn Vəliyev/
2014-cü ilin yanvar-oktyabr aylarının yekunu üzrə Azərbaycanda "Microsoft Windows 7" əməliyyat sisteminin (ƏS) bazarda payı 22,46 faiz azalıb. Trend-in məlumatına görə, bu barədə şənbə günü "Global Stats" Statistik Mərkəzi xəbər yayıb.
Windows 7-nin öz mövqeyindən tədricən geri çəkilməsinə baxmayaraq, o, hələ də Azərbaycanda ən populyar əməliyyat sistemidir və ƏS bazarında 38,31 faizlik payla birinci yerdədir. Ötən ilin analoji dövrünün göstəricisi ilə müqayisədə Azərbaycanın ƏS bazarında Windows 7-nin payı 21,36 faiz azalıb.
Göstərilən dövrdə Android-in ƏS bazarındakı payında əhəmiyyətli artım (79,34 faiz) qeydə alınıb; noyabrın 1-də 28 faizlik payla 2-ci yeri tutur ki, bu da ötən ilin analoji dövrünün göstəricisini 8 dəfə üstələyir.
Üçüncü yerdə 11,13 faizlik payla iOS qərarlaşıb. Bu, ötən ilin analoji dövrünün göstərisicini 3 dəfə üstələyir.
2013-cü ilin analoji dövrü ilə müqayisədə cari ilin yanvar-oktyabr aylarında Windows XP-nin bazarda payı 36,79 faiz azalıb. 2013-cü ilin oktyabr ayının sonuna olan göstərici ilə müqayisədə azalma 45,87 faiz təşkil edib. Azərbaycanın ƏS bazarının 8,18 faizi Windows XP-yə məxsusdur. Daha sonra sırada Windows 8 - 3,84 faiz, Windows 8.1 - 2,69 faiz, Series 40 - 2,47 faiz, Symbian - 0,97 faiz və digərləri gəlir.