Bakı. Trend:
“TEKNOFEST” Aerokosmik və Texnologiya Festivalı çərçivəsində yuxarı sinif şagirdləri və tələbələr üçün nəzərdə tutulan 3D çap texnologiyası üzrə müsabiqəyə qeydiyyat artıq başlayıb.
Trend xəbər verir ki, Azərbaycan Respublikası Rəqəmsal İnkişaf və Nəqliyyat Nazirliyinin təşkilatçılığı ilə cari ilin 26 – 29 may tarixlərində Bakıda ilk dəfə “TEKNOFEST” Aerokosmik və Texnologiya Festivalı keçiriləcək. Festivalın keçirilməsində əsas məqsəd aviasiya, kosmik sənaye, rəqəmsal iqtisadiyyat, təhsil, innovasiya və ətraf mühitin qorunması kimi sahələrin gənclər arasında təbliği, bu sahələrdə sahibkarlığın təşviq edilməsi, festival çərçivəsində təşkil olunan yarışlar vasitəsilə yeniyetmə və gənclərin bilik və bacarıqlarının üzə çıxarılması, eləcə də milli texnologiyaların geniş ictimaiyyətə təqdim olunmasıdır.
Qeyd edək ki, “Baku Skills” müsabiqəsinin keçirilməsində əsas məqsəd 3D çap texnologiyasından mükəmməl istifadə edən istedadlı şəxsləri aşkara çıxarmaqdır. 3D çap ən inqilabi texnologiyalardan biridir və gənc nəslin müvafiq texnoloji imkanlardan effektiv bir şəkildə istifadə etməsi günümüzün əsas tələblərindəndir. İnnovasiya yönümlü məhsul və prototiplərin hazırlanmasında, detalların və mexaniki hissələrin dizaynında, eləcə də müxtəlif model dizayn texnikasında 3D çap bacarıqları olduqca önəmlidir. 3D çap yaradıcı texnologiya olmaqla yanaşı, tələbələrə CAD proqram təminatından istifadə edərək problemləri necə həll etmək barədə düşünməyə fürsət verir.
“Baku Skills” müsabiqəsində iştirak etmək istəyən namizədlər hər hansı proqram təminatında 3D modelləşdirmə üzrə təməl bacarıqlara yiyələnmiş, STL/VRML tipli fayl uzantılarına yüklənmiş və ya 3D çap üçün nəzərdə tutulmuş modeli çapa göndərməyi bacaran şəxslər olmalıdır.
Qeydiyyat prosesini tamamlayan bütün iştirakçılar son nəsil 3D printerlər və PLA/ABS filamentləri ilə təmin olunacaqlar. Müsabiqənin müxtəlif mərhələlərində iştirakçılara CAD modellərinin dizaynı və onların çapı ilə bağlı tapşırıqlar veriləcək.
Müsabiqədə 2 kateqoriya üzrə iştirak etmək mümkündür. Müsabiqənin özəlliyi həm də ondan ibarətdir ki, orta məktəb şagirdləri A kateqoriyasını təmsil etməklə innovativ ideyalarını “TEKNOFEST” kimi mötəbər festivala təqdim edə biləcəklər. Azərbaycanda təhsil alan ali məktəb tələbələri isə B kateqoriyasına daxil olmaqla məhsul və layihələrini müsabiqəyə təqdim edə bilərlər.
Qeyd edək ki, sözügedən müsabiqə üzrə Mükafat fondu şagirdlər üçün (A kateqoriyası) I yer 4000 AZN, II yer 2000 AZN və III yer 1000 AZN təşkil edir.
B kateqoriyasını təmsil edən tələbələr üçün Mükafat fondu I yer 6000 AZN, II yer 4000 AZN, III yer isə 2000 AZN təşkil edir.
Müsabiqədə iştirak üçün son qeydiyyat tarixi 17 fevral 2022-ci ildir.
Qeydiyyat üçün elektron keçid: https://teknofest.az/az/competitions/
Əlavə məlumat əldə etmək üçün:
050 251 40 28
Xatırladaq ki, "Teknofest" mayın 26-29-da Azərbaycanda keçiriləcək.
Bakıda “Teknofest” Azərbaycan Respublikası Rəqəmsal İnkişaf və Nəqliyyat Nazirliyi tərəfindən keçirilir. Eyni zamanda Bakıda “Teknofest” in "prodakşn" ofisi fəaliyyət göstərir. Ofisin tam heyəti azərbaycanlı mütəxəssislərdən ibarətdir.
“Teknofest” tədbiri Türkiyə Respublikası Sənaye və Texnologiya Nazirliyinin və “Baykar Makina” şirkətinin texniki direktoru Selçuk Bayraktarın rəhbərlik etdiyi Türkiye Teknoloji Takımı Vakfının (T3 Vakfı) birgə təşkilatçılığı və qardaş ölkənin 60-dan çox dövlət qurumu, ali məktəbi və özəl şirkətinin tərəfdaşlığı ilə 2018-ci ildən etibarən hər il keçirilir.
Məqsəd Türkiyədə aviasiya, kosmik sənaye, rəqəmsal iqtisadiyyat kimi sahələrin gənclər arasında təbliği, bu sahələrdə sahibkarlığın təşviq edilməsi, festival çərçivəsində təşkil olunan yarışlar vasitəsilə gənc mühəndislərin bilik və bacarıqlarının üzə çıxarılması, eləcə də milli texnologiyaların geniş ictimaiyyətə təqdim olunmasıdır.
Trend İnformasiya Agentliyi, Day.Az, Milli,Az, Azernews, Eastweststream, Today.az və Turkic.World "Teknofest 2022" aerokosmik və texnologiya festivalının rəsmi media tərəfdaşlarıdır.