Azərbaycan Çinlə İT sahəsində əməkdaşlığa dair hökumətlərarası saziş imzalamağı planlaşdırır. Trend in xəbər verdiyi kimi, bu barədə avqustun 19-da Rabitə və İnformasiya Texnologiyaları Nazirliyinin beynəlxalq əlaqələr və qeyri-dövlət müəssisələri ilə iş üzrə şöbəsinin rəhbəri Ayaz Bayramov bildirib.
Onun sözlərinə görə, artıq sazişin layihəsi hazırlanıb və baxılmaq üçün Çin tərəfinə təqdim edilib.
Çinlə İKT sahəsində qarşılıqlı anlaşma haqqında memorandum prezident İlham Əliyevin 2005-ci ilin martında bu ölkəyə rəsmi səfəri zamanı imzalanıb. Bu memorandumun bəndlərinə müvafiq olaraq, hər iki ölkə arasında hökumətlərarası sazişin bağlanması nəzərdə tutulur.
Tərəflər sənədi oktyabrda Bakıda keçiriləcək İKT üzrə BakuTel 2006 beynəlxalq sərgi-konfransda imzalamaq niyyətindədir.
