Azərbaycan, Bakı/ Trend müxbir S.Babayeva/ Azərbaycanda informasiya-kommunikasiya texnologiyalarının inkişafı şəraitində əqli mülkiyyətin mühafizəsi ilə bağlı qanun və mexanizmin qəbul olunması çox mühimdir. Bunu cümə axşamı jurnalistlərə Azərbaycanın rabitə və informasiya texnologiyaları naziri Əli Abbasov bildirib.
Onun sözlərinə görə, bu işdə "Microsoft" korporasiyası Azərbaycana əməkdaşlıq və yardımını göstərəcək.
Nazir söyləyib ki, Azərbaycanda pirat məhsulların həcmi çox yüksəkdir və bu 93-95 faiz arasında dəyişir. Abbasov əqli mülkiyyətin qorunması məsələsinin Azərbaycanda regional innovasiya zonalarının yaradılması layihəsi ilə bağlı hazırlanmış zərfə daxil edildiyini söyləyib. Iyunun 7-də birgünlük səfərlə Bakıya gəlmiş "Microsoft" korporasiayasının baş vitse-prezidenti və texniki direktoru Kreyq Mandinin fikrincə, Azərbaycanda bu məsələnin həll olunması üçün az vaxt tələb olunmur və problemin həll olunmasında əsas ağırlıq hökumətin üzərinə düşür.
Rabitə naziri bildirib ki, korporasiyanın Azərbaycanda yeganə marağı əqli mülkiyyətin qorunması deyil, belə ki, Mandi ilə aparılan danışıqlar zamanı "Microsoft"un ölkədə regional informasiya mərkəzlərinin açılmasında və regional innovasiya zonalarının yaradılmasında iştirak etmək istəyi məlum olub.
"Azərbaycanın yeni inkişafında "Microsoft"un rolu böyükdür və biz əməkdaşlıq etmək niyyətindəyik" - deyə Abbasov söyləyib.