Bakı. Trend:
Çinin Şiqatse şəhərində baş verən 6,8 bal gücündə zəlzələ nəticəsində ölənlərin sayı 126-ya çatıb.
Trend xəbər verir ki, təbii fəlakət nəticəsində azı 188 nəfər xəsarət alıb.
xxx
12:31
Çinin cənub-qərbində yerləşən Tibet Muxtar Rayonunda (TMR) baş vermiş 6.8 ballıq zəlzələ nəticəsində ölənlərin sayı 95 nəfərə çatıb.
Trend xəbər verir ki, bu barədə CGTN nəşri məlumat yayıb.
Məlumata görə, zəlzələ nəticəsində azı 130 nəfər yaralanıb.
Qeyd edilir ki, Çin hökuməti TMR-da baş vermiş zəlzələ ilə əlaqədar alpinist-turistlərin Comolunqmaya (dünyanın ən hündür dağı) səyahətinə müvəqqəti qadağa qoyub.
xxx
09:30
Çinin cənub-qərbində yerləşən Tibet Muxtar Rayonunda (TMR) baş verən zəlzələ nəticəsində həlak olanların sayı 53 nəfərə çatıb, azı 60 nəfərin yaralandığı deyilir.
Trend xəbər verir ki, bu barədə “Hindustan Times” nəşri məlumat yayıb.
Məlumata görə, 6.8 bal gücündə zəlzələ baş verib və episentri Everest bölgəsinə şimaldan aparan yolun üzərində yerləşən Tinqri rayonu olub. Bundan əvvəl isə ABŞ Geoloji Xidməti Nepal sərhədi yaxınlığında TMR-də 7,1 bal gücündə zəlzələ qeydə alındığını bildirmişdi.
Zəlzələ bundan başqa Nepalda, Butanda və Hindistanda binaları silkələyib. Dağıntı və itkilər barədə məlumat verilmir.
xxx
08:25
Çinin cənub-qərbində yerləşən Tibet Muxtar Rayonunda (TMR) baş verən zəlzələ nəticəsində ölənlərin sayı 32-yə çatıb, 38 nəfər isə yaralanıb.
Trend xəbər verir ki, bu barədə Çin Dövlət Xəbər Agentliyi “Xinhua” məlumat yayıb.
ABŞ Geoloji Xidmətinin məlumatına görə, Nepal sərhədi yaxınlığında TMR-də 7,1 bal gücündə zəlzələ qeydə alınıb. Zəlzələnin episentri təxminən 80 min əhalisi olan Şiqadze şəhərindən 163 km cənub-qərbdə, ocağı isə 10 km dərinlikdə yerləşib.
Xilasetmə işləri davam edir, yerli hakimiyyət orqanları zərərçəkmişlərə yardım üçün resursları səfərbər edib.
xxx
07:46
Çinin cənub-qərbində yerləşən Tibet Muxtar Bölgəsində baş verən güclü zəlzələ ciddi dağıntılara və insan tələfatına səbəb olub.
Trend-in məlumatına görə, bu barədə Çin Mərkəzi Televiziyası xəbər yayıb.
Hazırda ölənlərin dəqiq sayı məlum olmasa da, yerli hakimiyyət orqanları axtarış-xilasetmə işlərinə başlayıb və zəruri resursları səfərbər edib. Zəlzələ bölgəsində yeraltı təkanların təkrarlanma ehtimalı səbəbindən əhali təxliyə edilir.
Hadisənin miqyası və dəqiq nəticələri ilə bağlı əlavə məlumatların verilməsi gözlənilir.
xxx
06:29
Çinin cənub-qərbində, Nepalla sərhədə yaxın Tibet Muxtar Bölgəsində 7,1 bal gücündə güclü zəlzələ baş verib.
Trend-in ABŞ Geoloji Xidmətinə istinadən verdiyi məlumata görə, yeraltı təkanların episentri 80 min nəfərdən çox əhalisi olan Şiqatse şəhərindən 163 km cənub-qərbdə yerləşib.
Zəlzələnin ocağı 10 km dərinlikdə olub. Hazırda tələfat və dağıntılar barədə məlumat verilməyib, lakin hadisənin yaşanmış ərazilərdə ciddi təsir yaratmadığı bildirilir. Zəlzələ bölgədəki sakinlər arasında narahatlıq yaradıb, amma ətraflı məlumatların əldə edilməsi üçün araşdırmalar davam edir.