Bakı. Trend:
Argentina polisi “İslam Dövləti” (İŞİD) terror qruplaşması ilə əlaqədə olmaqda və terror aktı hazırlamaqda şübhəli bilinən şəxsi həbs edib.
Trend xəbər verir ki, bu barədə ölkənin təhlükəsizlik naziri Patrisiya Bullriç məlumat yayıb.
Nazirin sözlərinə görə, bu əməliyyat ölkədə İŞİD terrorçusuna qarşı milli polis tərəfindən həyata keçirilən ilk uğurlu əməliyyatdır. Bullriç X sosial şəbəkəsində bildirib: "Bir İŞİD terrorçusu, qrupa sızan bir agent vasitəsilə həyata keçirilən əməliyyatda saxlanılıb. Agent terrorçunu müəyyən edib və hücumu törətməzdən əvvəl təhlükəni aradan qaldırıb."
Bullriç tərəfindən yayımlanan videoda saxlanılan şəxs, David Nasareno Avilanın mesajları əks olunub. Bu mesajlarda o, Argentina hökumətini “sionist” adlandırır və terror aktı törətmə niyyətini etiraf edir.
Nazirin sözlərinə görə, hüquq-mühafizə orqanları saxlanılan şəxsin terror qruplaşması ilə əlaqəsini təsdiq edib. Hazırda istintaq davam edir.