Bakı. Trend:
Britaniyalı müğənni və aktrisa Marianna Feitfull 79 yaşında vəfat edib.
Trend xəbər verir ki, müğənni Londonda, mehriban ailəsinin əhatəsində dinc şəkildə dünyasını dəyişib.
Feitfullun məşhurluğu 1965-ci ildə The Rolling Stones qrupunun üzvləri Mik Jaqqer və Kit Riçards tərəfindən yazılmış "As Tears Go By" hit mahnısı ilə başladı.
Müğənnini 1964-cü ildə qrupun meneceri olan ingilis prodüseri Endryu Luq Oldem kəşf edib. Feitfullun digər məşhur mahnıları arasında "Come and Stay with Me", "This Little Bird" və "Summer Nights" yer alır. 1980-ci ildə "Broken English" albomu ilə ən yaxşı qadın rok vokal performansı üzrə Grammy mükafatına namizəd olub.
Feitfull həmçinin aktrisa kimi də tanınırdı. O, "The Girl on a Motorcycle" (1968) və "İrina Palm" (2007) filmlərindəki rolları ilə şöhrət qazanıb.