Bakı. Trend:
Almaniyanın "Bosch" konserni çətin bazar vəziyyəti və iqtisadi çətinliklərə görə iş yerlərini ixtisar etməyi planlaşdırır.
Trend xəbər verir ki, "Bosch" CEO-su Stefan Hartunq "Stuttgarter Zeitung" və "Stuttgarter Nachrichten" qəzetlərinə verdiyi müsahibədə belə bir qərarın alınmasının qaçılmaz olduğunu bildirib: "Biz daha çox ixtisarların qarşısını ala bilmərik", - deyə Hartunq qeyd edib.
O, bu addımı avtomobil sektorundakı qlobal iqtisadi zəiflik, Çindən artan rəqabət və istehlakçılar arasında qeyri-müəyyənlik ilə izah edib. Onun sözlərinə görə, daxili yanma mühərriklərindən elektrik ötürücülərə keçid də iş yerlərinin ixtisarına səbəb olacaq.
Bununla yanaşı, Hartunq elektromobil sənayesinin gözlənildiyi sürətlə inkişaf etməməsinin müsbət təsirini qeyd edib. Bu, mövcud daxili yanma mühərriklərinin istehsal güclərini daha uzun müddət tam istifadə etməyə imkan yaradacaq.
Bosch CEO-su həmçinin, transformasiya prosesi ilə əlaqədar bir çox işçinin təqaüdə çıxacağı və işlərini itirəcəyi barədə də məlumat verib.