Bakı. Trend:
Almaniyada 2011-ci ildə ləğv edilən məcburi hərbi xidmətin bərpası ilə bağlı müzakirələr intensivləşib.
Trend xəbər verir ki, Rusiya-Ukrayna müharibəsindən sonra Almaniya Silahlı Qüvvələrində 100 mindən çox şəxsi heyət çatışmazlığı yaranıb.
Bu fonda Bundestaqın Silahlı Qüvvələr üzrə müvəkkili Eva Höql problemin həllinin vacibliyini vurğulayıb, Bundesverin baş müfəttişi general Karsten Breuer isə ölkənin müdafiə qabiliyyətinin zəiflədiyini və fərqli həll yollarının nəzərdən keçirildiyini bildirib.
Siyasi mövqelər fərqlidir:
CDU/CSU partiyaları mərhələli şəkildə məcburi hərbi xidmətin bərpasını və həm kişilər, həm də qadınlar üçün birillik xidmətin tətbiqini təklif edir.
SPD isə hərbi xidmətin könüllü əsasda aparılmasını dəstəkləyir və yalnız ehtiyac olduğu qədər çağırışın həyata keçirilməsini istəyir.
Yaşıllar Partiyası “Azadlıq xidməti” adlı altı aylıq məcburi ictimai xidmət modelini irəli sürür.
AfD ikiillik məcburi hərbi xidmətin bərpasını müdafiə edir.
Sol Partiya isə hərbi xidmətin tamamilə könüllü əsasda həyata keçirilməsini istəyir.
Aparılan sorğular göstərir ki, Almaniya vətəndaşlarının 58 faizi məcburi hərbi xidmətin bərpasını dəstəkləsə də, 18-29 yaşlıların 61 faizi bu ideyanın əleyhinədir. Bu isə hökumətin yekun qərar verməsini daha da çətinləşdirir.
