Bakı. Trend:
Niderland Ukrayna üçün pilotsuz təyyarələrin istehsalı üzrə genişmiqyaslı layihəyə 500 milyon avro ayırıb.
Trend xəbər verir ki, Niderland Müdafiə Nazirliyinin məlumatına görə, bu maliyyə paketi Ukraynaya 2025-ci il üçün nəzərdə tutulan 2 milyard avroluq sürətləndirilmiş dəstəyin bir hissəsidir.
"Bu vəsait Ukraynaya Rusiyanın cəbhə xəttindəki hücumlarını dayandırmağa kömək etməlidir", - məlumatda bildirilib.
Pilotsuz təyyarələrin istehsalına maliyyə ayırmaq barədə qərar Niderlandın müdafiə naziri Ruben Brekelmans və dövlət katibi Qeys Tuynmanın Ukraynaya son səfəri zamanı qəbul edilib.