Bakı. Trend:
Ötən İran ilində (20 mart 2024 -20 mart 2025) İranın şimal-qərbində yerləşən Qərbi Azərbaycan vilayətinin Mahabad gömrüyü vasitəsi ilə qeyri-neft məhsulları ixracı öncəki illə (21 mart 2023 -19 mart 2024) müqayisədə iki dəfə artıb.
Trend-in məlumatına görə, bunu İranın Mahabad gömrük idarəsinin direktoru Əhməd Əhmədi yerli mediaya açıqlamasında deyib.
Onun sözlərinə görə, ötən İran ilində Mahabad gömrüyü vasitəsi ilə 42 milyon dollar dəyərində qeyri-neft məhsulları ixrac edilib. Ötən ildə isə Mahabad gömrüyü vasitəsi ilə 21 milyon dollar dəyərində məhsul ixrac olunub.
Əhmədi deyib ki, əsasən, neft-kimya məhsulları, xalça və sairə Mahabad gömrüyü vasitəsi ilə qonşu ölkələrə ixrac olunub.
Qeyd edək ki, İranın Mahabad gömrüyü Qərbi Azərbaycan vilayətində fəaliyyət göstərən 9 gömrükdən biridir. Qərbi Azərbaycan vilayətinin İraq, Türkiyə və Azərbaycanın Naxçıvan Muxtar Respublikası ilə sərhədi var.
Əlavə edək ki, ötən İran ilində İranın Qərbi Azərbaycan vilayətinin gömrükləri vasitəsi ilə 2,01 milyard dollar dəyərində 3,3 milyon ton qeyri-neft məhsulları ixrac olunub.