Bakı. Trend:
Mina problemi bəşəri problemdir. İnsanların mina təhlükəsinə dair maarifləndirilməsi, minalara qarşı mübarizənin gücləndirilməsi, problemin beynəlxalq ictimaiyyətin diqqətində saxlanılması məqsədi ilə BMT Baş Assambleyasının 2005-ci ildə qəbul etdiyi Qətnamə ilə 4 Aprel Beynəlxalq Mina Xəbərdarlığı və Mina Təhlükəsi ilə Mübarizəyə Yardım Günü kimi qeyd edilir. Mina təhlükəsi ilə mübarizə fəaliyyətinin əsas prioritet istiqamətlərindən biri partlayıcı sursatların təhlükəsinə dair maarifləndirmə tədbirləridir.
Trend xəbər verir ki, 4 aprel gününü qeyd etmək məqsədilə Azərbaycan Respublikasının Minatəmizləmə Agentliyi (ANAMA) və Azərbaycan Futbol Federasiyaları Assosiasiyasının (AFFA) birgə təşkilatçılığı ilə Bakı Olimpiya Stadionunda "Minalara YOX deyək" şüarı altında amputant futbol komandaları arasında yoldaşlıq oyunu keçirilib.
Mina partlayışları nəticəsində xəsarət almış amputant şəxslərdən ibarət futbol oyunlarının keçirilməsi mina təhlükəsinə dair maarifləndirmə sahəsində kütləviliyin artırılması, eləcə də minadan zərərçəkmiş şəxslərin sosial inteqrasiyası istiqamətində böyük əhəmiyyət kəsb edir.
Qeyd edək ki, Azərbaycanın amputant milli komandası 2023-cü ildə Şotlandiyada keçirilən EAFF Millətlər Liqasının D liqasında, 2024-cü ildə Fransada keçirilən Avropa çempionatının final mərhələsində iştirak edib, eləcə də cari ilin 16-20 oktyabr tarixlərində ölkəmizdə keçirilməsi nəzərdə tutulan EAFF Millətlər Liqasında iştirak edəcək. Turnirinin C liqasında milli komandamız İsrail, Ukrayna, Niderland və Belçika milliləri ilə qarşılaşacaq.
