Bakı. Trend:
İqtisadiyyat Nazirliyi yanında Dövlət Vergi Xidmətinin Vergi siyasəti baş idarəsi, İqtisadi təhlil və proqnozların icrasına nəzarət baş idarəsi və avtomobil dilərlərinin nümayəndələrinin iştirakı ilə görüş baş tutub.
Trend-ə bu barədə Dövlət Xidmətindən məlumat verilib.
Məlumata görə, görüşdə Azərbaycan Avtomobil Dilerləri Assosiasiyası tərəfindən ölkədə avtomobil bazarının cari vəziyyəti barədə statistik məlumatlar səsləndirilib. Qanunvericlikdə tətbiq olunan yeni güzəşt mexanizmləri sayəsində son illər elektrik və hibrid mühərrikli avtomobillərin sayında artım olduğu diqqətə çatdırılıb.
Görüş zamanı rəsmi dilerlərin avtomobil bazarında mövcud çətinlikləri müzakirə edilib, bu istiqamətdə Türkiyə, Qazaxstan və digər ölkələrin təcrübələri qeyd olunub. Daha sonra kreditləşmə, nisyə qaydada satış və rəsmi dilerlər tərəfindən 2-ci əl avtomobillərin təkrar satışında yaranan ƏDV öhdəlikləri ətrafında məsələlərə toxunulub.
Dövlət Vergi Xidmətinin əməkdaşları tərəfindən vergi qanunvericilyinin bəzi aspektəri izah olunub, işitrakçıların sualları cavablandırılıb, gələcəkdə belə görüşlərin davam etdirilməsinin zəruriliyi diqqətə çatdırılıb.
