Bakı. Trend:
İran Azərbaycanla 2025-ci ilin yay fəslində bu ölkədən 140 meqavatt elektrik idxal etmək üçün danışıqlar aparır.
Trend-in məlumatına görə, bunu İranın TAVANIR şirkətinin elektrikin xarici ticarəti idarəsinin baş direktoru Mehrdad Eqlimi yerli mediaya açıqlamasında deyib.
Onun sözlərinə görə, bundan əlavə, 2025-ci ilin yay fəslində elektrik idxalı məqsədilə yeni müqavilə əlavəsinin imzalanması diqqət mərkəzində saxlanılır.
Eqlimi bildirib ki, Azərbaycan tərəfi İran, Azərbaycan və Rusiya arasında elektrik şəbəkəsinin birləşdirilməsinin araşdırılması məqsədilə Bakıda iclasın keçirilməsi təklifini müsbət qarşılayıb. Bu istiqamətdə ciddi addımların atılması məqsədilə texniki işlərin sürətləndirilməsi və imkanların dəyərləndirilməsi diqqət mərkəzindədir.
Əlavə edək ki, İran, Azərbaycan və Rusiya arasında Şimal-Cənub enerji dəhlizinin yaradılması layihəsi üzərində işlər aparılır. Məqsəd üç ölkənin elektrik şəbəkələrinin sinxron edilməsidir. Bu layihə ilə bağlı lazımi layihələndirmə işlərini İranın “Monenko” Şirkəti həyata keçirib.