Bakı. Trend:
Səudiyyə Ərəbistanının bir neçə şirkəti Suriyanın Energetika Nazirliyi ilə qaz yataqlarının kəşfiyyatı və işlənməsi, qazma, qaz emalı, geofiziki tədqiqatlar və seysmik məlumatların şərhi sahəsində əməkdaşlığı əhatə edən 6 qarşılıqlı anlaşma memorandumu imzalayıb.
Trend xəbər verir ki, TAQA və ADES Holdinq neft və qaz yataqlarının işlənilməsi və idarə olunması üçün kompleks həllər təmin edəcək memorandumlar imzalayıb. “Arabian Drilling Company” qazma və texniki xidmətləri, “Arabian Geophysical and Surveying Company” (ARGAS) isə geofiziki və geoloji tədqiqat sahəsində əməkdaşlığı nəzərdə tutan razılaşmalar əldə edib.
Enerji sektorunda Səudiyyə Elektrik Şirkəti enerji istehsalı, ötürülməsi, paylanması, eləcə də texniki və konsaltinq dəstəyi sahəsində memorandum imzalayıb. Səudiyyə Elektrik Layihəsinin İnkişafı Şirkəti isə mühəndislik, konsaltinq xidmətləri və enerji paylanması üzrə layihələrdə əməkdaşlıq edəcək.
Bundan əlavə, “ACWA Power” şirkəti 1000 meqavata qədər günəş enerjisi və enerji saxlama sistemləri, həmçinin 1500 meqavata qədər külək enerjisi layihələri üzrə tədqiqat və təkliflərin hazırlanmasını nəzərdə tutan memorandum imzalayıb. Sənəd həmçinin Suriyanın mövcud elektrik stansiyalarının qiymətləndirilməsi, reabilitasiyası və modernləşdirilməsi, milli şəbəkənin qiymətləndirilməsi və optimal enerji balansının müəyyən edilməsi üzrə texniki tədqiqatları əhatə edir.
ABŞ Enerji İnformasiya Administrasiyasının məlumatına görə, silahlı münaqişə zamanı Suriyanın neft və qaz infrastrukturu ciddi ziyan görüb. 2011-ci ilə qədər ölkədə gündə təxminən 400 min barel neft hasil edilərək ixrac olunurdusa, son illərdə hasilat 10 dəfədən çox azalıb və Suriya əksər yanacaq növlərinə görə idxaldan asılıdır.