Bakı. Trend:
Beynəlxalq Maliyyə Hesabatı Standartlarına (BMHS) əsasən, "Rosneft" ASC-nin səhmdarlara aid xalis mənfəəti 2025-ci ilin yanvar-sentyabr aylarında ötən ilin eyni dövrü ilə müqayisədə 70,1% azalaraq 277 milyard rubl (təxminən 3,6 milyard ABŞ dolları) olub.
Trend xəbər verir ki, bu barədə şirkətin maliyyə göstəricilərinə istinadən "Kommersant" qəzeti xəbər yayıb.
Bildirilib ki, "Rosneft"in ümumi gəlirləri 17,8% azalaraq 6,28 trilyon rubla enib.
Şirkətin əməliyyat mənfəəti də 29% azalaraq 1,64 trilyon rubla düşüb. Düzəldilmiş sərbəst pul axını 45% geriləyərək 591 milyard rubla çatıb. Doqquz ay ərzində kapital xərcləri isə 6% artaraq 1,11 trilyon rubla yüksəlib.
Hesabat dövründə şirkətin maye karbohidrogen hasilatı 134,7 milyon ton (gündə 3,6 milyon barel) təşkil edib ki, bu da ötən ilin göstəricisindən 2,6% azdır. Neft emalı həcmi 57,7 milyon tona düşüb ki, bu da 7,8% azalma deməkdir. Azalma neft emalı zavodlarında aparılan təmir-bərpa işləri və onların yüklənməsinin optimallaşdırılması ilə izah olunur.
Qaz hasilatı isə 13,1% azalaraq 58,2 milyard kubmetr olub.
Xatırladaq ki, ABŞ Maliyyə Nazirliyi 22 oktyabr tarixində "Rosneft", "Lukoyl" və onların törəmə şirkətlərini yeni anti-Rusiya sanksiyaları siyahısına daxil edib. Bu sanksiyalar 21 noyabrda tam şəkildə qüvvəyə minib.