Bakı. Trend:
Federal Ehtiyat Sisteminin rəhbərliyi hesab edir ki, ABŞ-də məşğulluq artımının zəifləməsi immiqrasiya axınının azalması ilə əlaqədar ola bilər.
Trend xəbər verir ki, bu fikirləri Federal Ehtiyat Sisteminin İdarə Heyətinin sədri Cerom Pauell mətbuat konfransı zamanı səsləndirib.
Onun sözlərinə görə, son bir il ərzində məşğulluq artım tempinin aşağı düşməsinin mühüm hissəsi immiqrasiyanın və işçi qüvvəsində iştirak səviyyəsinin azalması fonunda işçi qüvvəsinin genişlənmə sürətinin zəifləməsi ilə izah olunur. Bununla yanaşı, Pauell qeyd edib ki, işçi qüvvəsinə tələbat da açıq şəkildə azalıb.
FES rəhbəri əlavə edib ki, iş yerlərinin sayı, işdən çıxarmalar, işə qəbul göstəriciləri və nominal əmək haqqı artımı kimi digər əsas göstəricilər son aylarda ümumilikdə sabit qalıb.