Bakı. Trend:
ABŞ-nin Florida ştatında eyni şübhəli şəxs tərəfindən törədildiyi güman edilən iki hücum nəticəsində altı nəfər ölüb.
Trend xarici KİV-ə istinadən xəbər verir ki, bu barədə yerli hakimiyyət orqanları məlumat yayıb.
Məlumata görə, qətllər ştatın bir-birindən təxminən 320 km məsafədə yerləşən iki şəhərində baş verib. Birinci hadisə Fort-Loderdeyldə, ikinci isə Sarasota şəhərində qeydə alınıb.
Fort-Loderdeyldə evlərdən birində polis həlak olmuş Larisa Blyuday və onun 18 yaşlı oğlu Ben Azivovun meyitlərini aşkar edib. Sarasota şəhərində isə hücum edən şəxs yaşları 39-dan 66-ya qədər olan dörd nəfəri qətlə yetirib. Onların şəxsiyyəti də müəyyən edilib. Atəş açan şəxsin meyiti aşkarlanıb.
İlkin istintaqın məlumatına görə, hücum edən şəxs Fort-Loderdeyldəki qurbanlardan biri ilə romantik münasibətdə olub. Onun Sarasota şəhərində qətlə yetirilən şəxslərlə əlaqəsi hələlik məlum deyil.