Bakı. Trend:
Heç bir danışıqlar olmayacaq.
Trend xəbər verir ki, bunu Pakistanın baş nazirinin mətbuat katibi Müşərrəf Zaidi bildirib.
O, Əfqanıstan Talibanının sözçüsü Zabihullah Mücahidin cümə günü keçirdiyi mətbuat konfransında ölkəsinin gərginliyin aradan qaldırılması üçün danışıqlara açıq olduğunu bildirməsini şərh edib.
“Danışıqlar olmayacaq. Heç bir dialoq yoxdur. Heç bir müzakirə aparılmayacaq. Əfqanıstandan qaynaqlanan terrorizmə son qoyulmalıdır”, - Zaidi bildirib.
O vurğulayıb ki, Pakistanın məsuliyyəti yalnız öz vətəndaşlarını və ərazisini qorumaqla məhdudlaşır.
Qeyd edək ki, Pakistan Əfqanıstan münaqişəsi ölkə ərazisində (Pakistanda) ard-arda törədilən terror aktlarından sonra yenidən alovlanıb.
Fevralın 6-da İslamabadda yerləşən şiə məscidində törədilən intihar partlayışı nəticəsində azı 36 nəfər həlak olub.
Fevralın 21-də isə Xeybər-Paxtunxvada yerləşən Bannu şəhərində daha bir terrorçu kamikadze təhlükəsizlik konvoyuna hücum edərək iki hərbçini öldürüb. Həmin hücumlar Pakistanın Əfqanıstan ərazisində ilk zərbə dalğasına başlamasına səbəb olub. Pakistanın bildirdiyinə görə, zərbələr silahlı qrupların, xüsusilə də “Təhrik-e-Taliban Pakistan” (Pakistan Talibanı) üzvlərinin gizləndiyi sığınacaqlara və bazalara yönəldilib.
Əfqanıstan tərəfi bu hücumlar nəticəsində azı 18 nəfərin öldüyünü açıqlayıb və cavab tədbirləri görəcəyini bəyan edib ki, bu da cümə axşamı gecəsi silahlı toqquşmaların başlanmasına gətirib çıxarıb.