Bakı. Trend:
İranın hava məkanı qısa zamanda tam nəzarətə götürüləcək
Trend xarici KİV-ə istinadən xəbər verir ki, bunu ABŞ-nin müharibə naziri Pit Heqset keçirdiyi mətbuat konfransında bildirib.
Onun sözlərinə görə, ABŞ və İsrail qüvvələrinin bir neçə gün ərzində İran səmasına tam nəzarətə sahib olacağı gözlənilir.
Pentaqon rəhbəri eyni zamanda bildirib ki, İranla yaşanan münaqişə fonunda ABŞ Yaxın Şərqə əlavə qüvvələr göndərib. Əməliyyatların nə vaxt başa çatacağı ilə bağlı suala o, “bunu dəqiq demək hələ çox erkəndir. Prezident Tramp da bildirib ki, qarşıya qoyulmuş məqsədlərə çatmaq üçün nə qədər vaxt lazımdırsa o qədər də sərf edəcəyik”.
Xatırladaq ki, fevralın 17-də Vaşinqton və Tehran arasında keçirilən nüvə danışıqlarının ikinci raundu irəliləyişsiz başa çatdıqdan sonra ABŞ İrana yaxın ərazilərdə mövcudluğunu artıraraq Avropa və Yaxın Şərqdəki bazalara 150-dən çox təyyarə yerləşdirib.
Qeyd edək ki, fevralın 26-da Cenevrədə İran və ABŞ arasında İranın nüvə proqramı ilə bağlı danışıqların üçüncü raundu keçirilib. ABŞ Prezidenti Donald Tramp administrasiyasında baş tutan görüş vəziyyətin diplomatik yolla tənzimlənməsi üçün son şans kimi qiymətləndirilirdi. Danışıqlarda konkret razılaşmalar əldə olunmayıb. Tehran uranın zənginləşdirilməsini dayandırmaqdan, nüvə obyektlərini demontaj etməkdən və nüvə proqramının inkişafına müddətsiz məhdudiyyətlər tətbiq etməkdən imtina edib. Fevralın 28-də səhər saatlarında İsrail və ABŞ İrana hərbi hava hücumlarına başlayıb.
İsrail və ABŞ-nin 28 fevralda həyata keçirilən hərbi hava hücumlarında İranın Ali Lideri Ayətullah Seyid Əli Xamenei və onun ailə üzvləri ölüb.
Eyni zamanda İran Ordusunun Baş Qərargah rəisi general-mayor Əbdülrəhim Musəvi, İran İslam İnqilabı Keşikçilər Korpusunun (SEPAH) baş komandanı Məhəmməd Pakpur, İranın Ali Liderinin müşaviri və Müdafiə Şurasının katibi Əli Şəmxani, müdafiə naziri Əziz Nəsirzadə hərbi hava hücumları zamanı ölüblər.