Bakı. Trend:
Yaponiyada yaşı 15-dən az olan uşaqların sayı tarixi minimumu yeniləyib.
Trend xəbər verir ki, bunu hər il mayın 5-də qeyd olunan "Uşaqlar Günü" ərəfəsində Yaponiyanın Daxili İşlər və Rabitə Nazirliyi tərəfindən açıqlanan statistik məlumatlar əks etdirir.
Məlumata əsasən, 2026-cı il aprelin 1-nə olan vəziyyətə görə ölkədə 15 yaşadək 13,29 milyon uşaq qeydə alınıb ki, bu da ötən illə müqayisədə 350 min nəfər azdır. Bu göstərici 1950-ci ildən - yəni müvafiq statistikanın aparılmasına başlanıldığı vaxtdan bəri ən aşağı səviyyədir. Eyni zamanda, Yaponiyada uşaqların sayı artıq ardıcıl olaraq 45-ci ildir ki, azalır.
Həmçinin qeyd olunur ki, uşaqların ümumi əhali sayındakı payı da il ərzində 0,3 faiz bəndi azalaraq 10,8 faizə düşüb. Bu da yeni antirekord hesab olunur.
