Bakı.Trend:
Tibb vasitələrinin dövlət qeydiyyatı əhalinin sağlamlığının qorunması, bazara çıxarılan məhsulların təhlükəsizliyinin, keyfiyyətinin və effektivliyinin təmin edilməsi məqsədilə həyata keçirilir.
Bu fikirləri "Sağlam radio"nun (93 FM) "Sağlam səhər" proqramında Səhiyyə Nazirliyi Analitik Ekspertiza Mərkəzinin Tibb vasitələrinin qeydiyyat, ekspertiza və idxalı şöbəsinin müdir müavini Telli Əlizadə səsləndirib.
Onun sözlərinə görə, Azərbaycanda tibb vasitələrinin dövlət qeydiyyatı Səhiyyə Nazirliyi tərəfindən həyata keçirilir. Qeydiyyat prosesinin təşkili, müraciətlərin qəbulu, təqdim olunan sənədlərin ekspertizası və dövlət reyestrinin aparılması isə Analitik Ekspertiza Mərkəzinin səlahiyyətlərinə daxildir.
Telli Əlizadə bildirib ki, tibb vasitələrinin dövlət qeydiyyatı Nazirlər Kabinetinin 18 iyul 2024-cü il tarixli Qərarı ilə təsdiq edilmiş müvafiq Qaydalara əsasən həyata keçirilir. Dövlət qeydiyyatı üçün istehsalçı, məhsulun təyinatı, texniki xüsusiyyətləri, təhlükəsizlik və effektivlik göstəriciləri, istifadə təlimatı, etiket nümunələri, uyğunluğun qiymətləndirilməsini təsdiq edən sənədlər, eləcə də qanunvericilikdə nəzərdə tutulmuş digər materiallar təqdim edilməlidir.
Şöbə müdirinin müavini qeyd edib ki, qaydaların tələblərinə uyğun olaraq təqdim olunan sənədlər ekspertizaya göndərilir. Bu mərhələdə sənədlərin tamlığı, düzgünlüyü və qanunvericiliyin tələblərinə uyğunluğu, həmçinin tibb vasitəsinin təhlükəsizlik, keyfiyyət və effektivlik göstəriciləri qiymətləndirilir.
Telli Əlizadə vurğulayıb ki, ekspertiza Nazirlər Kabinetinin 25
dekabr 2019-cu il tarixli 502 nömrəli Qərarı ilə təsdiq edilmiş
qaydalara uyğun aparılır. Bu zaman məhsulun texniki sənədləri,
istehsal prosesi, istifadə təyinatı, etiketlənməsi, qablaşdırılması
və istifadəsinə dair məlumatlar təhlil edilir, zərurət yarandıqda
isə əlavə sənədlər tələb oluna bilər.
Onun sözlərinə görə, qeydiyyat prosesinin mühüm mərhələlərindən
biri risk əsaslı yanaşma əsasında aparılan laborator
qiymətləndirmədir. Zəruri hallarda tibb vasitələrinin nümunələri
laborator sınaqlara cəlb olunur və onların texniki göstəricilərə,
təhlükəsizlik, keyfiyyət, funksionallıq və normativ tələblərə
uyğunluğu yoxlanılır.
"Laborator sınaqların nəticələri sənəd ekspertizasının nəticələri ilə birlikdə qiymətləndirilir. Tibb vasitəsinin müəyyən edilmiş tələblərə cavab verdiyi təsdiqləndikdə, məhsul dövlət qeydiyyatına alınır, dövlət reyestrinə daxil edilir və Azərbaycanda qanunvericiliyə uyğun dövriyyəsinə və istifadəsinə icazə verilir. Bu mexanizm ölkədə istifadə olunan tibb vasitələrinin təhlükəsizliyinin təmin edilməsinə, pasiyentlərin sağlamlığının qorunmasına, həmçinin səhiyyə sistemində keyfiyyət və etibarlılıq standartlarının yüksəldilməsinə xidmət edir", – deyə Telli Əlizadə fikrini yekunlaşdırıb.
