Azərbaycan, Bakı, 25 iyun /Trend, müxbir Aygün Bədəlova/
"Bakı 2015" Avropa Oyunlarının saytı internet istifadəçiləri arasında çox populyardır, ötən gün sayta 4,6 milyon baxış olub. Trend-in məlumatına əsasən, bunu "Bakı 2015" Avropa Oyunları Əməliyyat Komitəsinin əməliyyatlar üzrə baş icraçı direktoru Saymon Kleq deyib.
O, ötən gün FIFA-nın çimərlik futbolu üzrə nümayəndəsi Con Kusko ilə birgə bu idman növündə yarışlarda iştirak etdiyini bildirib: "Oyunlar sadəcə möhtəşəm idi. C.Kusko bildirdi ki, çimərlik futbolu tarixində idmançıların heç vaxt Bakıdakı kimi idman arenası olmayıb. Hesab edirəm ki, çimərlik futbolunu I Avropa Oyunlarının proqramına daxil etmək əla qərar idi".