Azərbaycan, Bakı, 2 oktyabr /Trend/
Azərbaycan Mədəniyyət və Turizm Nazirliyi I Bakı Beynəlxalq Turizm Filmləri Festivalı çərçivəsində "Odlar yurdu" fotomüsabiqəsini elan edir.
Trend nazirliyin rəsmi saytına istinadən məlumat verir ki, müsabiqəyə Azərbaycanın təbiət mənzərələrini, adət-ənənələrini, tarixi abidələrini əks etdirən fotolar qəbul olunur.
Müsabiqənin keçirilməsində məqsəd tarixi və mədəni irsin beynəlxalq mərkəzlərindən olan Azərbaycanın turizm potensialına diqqət cəlb etməkdir.
Müsabiqəyə fotolar 30 oktyabr 2013-cü il tarixinədək qəbul olunur. Hər iştirakçı maksimum 5 foto təqdim edə bilər.
Qalibləri beynəlxalq münsiflər heyəti müəyyən edəcək. Ən yaxşı işlər 20-24 noyabr 2013 tarixində Nizami Kino Mərkəzində sərgilənəcək.
Qaliblər festivalın təntənəli bağlanış mərasimində mükafatlandırılacaq.
Daha ətraflı məlumatı Bakı Beynəlxalq Turizm Filmləri Festivalının rəsmi veb saytından əldə etmək olar: http://www.bitff.az