Azərbaycan, Bakı, 10 oktyabr /Trend/
Hava Nəqliyyatında Baş Gömrük İdarəsinin əməkdaşları tərəfindən Doha-Bakı aviareysi ilə Heydər Əliyev Beynəlxalq Hava Limanına daxil olan Azərbaycan Respublikasının vətəndaşı Ramiz Hüseynovun baqajına gömrük baxışı keçirilib.
Dövlət Gömrük Komitəsindən Trend-ə verilən məlumata görə, R.Hüseynovun baqajına rentgen aparatı vasitəsilə baxış keçirilərkən monitorda bıçaq təsvirləri əks olunub. Bununla əlaqədar, Hava Nəqliyyatında Baş Gömrük İdarəsinin əməkdaşları baqaja təkrar baxış keçirib və nəticədə R.Hüseynova məxsus çamadandan gömrük nəzarətinə təqdim edilməyən 2 ədəd bıçaq aşkar olunub.
Ədliyyə Nazirliyi Məhkəmə Ekspertizası Mərkəzinin arayışına əsasən, 2 ədəd bıçaq - zavod üsulu ilə istehsal edilmiş, bir tərəfi kəsici, ucu deşici xassəyə malik olan, ümumi təyinatlı ov bıçaqlarıdır, soyuq silah hesab edilir və istifadəyə yararlıdır.
Faktla bağlı təhqiqat aparılır.