Azərbaycan, Bakı, 8 may /Trend, müxbir A.Hüseynbala/
Azərbaycanın paytaxtında Şuşanın işğalına etiraz olaraq Serj Sarkisyanın şəkli yandırılıb.
Qarabağ Azadlıq Təşkilatının şənbə günü yaydığı məlumata görə, bu gün Şuşanın işğal tarixini "İşğalçılara nifrət günü" kimi qeyd edib.
"Şəhidlər Xiyabanı ziyarət olunub, şəhidlərin xatirəsi yad edilib. Ziyarətin sonunda QAT üzvləri Şəhidlər Xiyabanında Əbədi Məşəlin yaxınlığında və Şəhidlər Xiyabanının çıxışında Ermənistanın bayraqlarını, həmçinin, bayraqların üstünə yapışdırdıqları Levon Ter-Petrosyan, Robert Koçaryan, Serj Sarkisyan, Seyran Ohanyanın şəkillərini yandırdılar, "İşğalçı Ermənistana ölüm!", "Müharibənin başlanmasını tələb edirik!" və digər şüarlar səsləndiriblər", - məlumatda qeyd olunur.
Azərbaycanın Dağlıq Qarabağ bölgəsində yerləşən Şuşa şəhərinin Ermənistan tərəfindən işğal olunmasından 18 il ötür. 1992-ci il mayın 8-nə keçən gecə erməni birləşmələri Şuşa şəhərinin işğalı ilə başa çatan əməliyyat keçirib. Şəhərin kütləvi şəkildə artilleriya atəşinə tutulması mayın 8-də səhər saat 6-dək davam edib. Bundan sonra düşmənin minə yaxın əsgəri üç tərəfdən Şuşaya hücum edib. Hücum Rusiyanın əvvəldən ermənilərə verdiyi 366-cı alayın 40 zirehli texnikasının dəstəyi ilə həyata keçirilib.
Şuşada dövlət tərəfindən qorunan 248 tarixi abidə, 8 muzey, bir rəsm qalereyası, bir məqbərə, 8 musiqi məktəbi, onlarca mədəniyyət obyekti işğal altında qalıb.
Məqalə müəllifi ilə əlaqə ünvanı news@trend.az
Bizi Twitter-dən izləyin @trend_az
Trend-in ən mühüm və maraqlı xəbərlərini "Telegram"da izləyin
.jpg)
