Azərbaycan, Bakı, 31 mart /Trend, müxbir K.Zərbalıyeva/
Beynəlxalq Qızıl Xaç Komitəsinin (BQXK) Bakı nümayəndəliyinin əməkdaşları Azərbaycanda əsirlikdə olan Ermənistan hərbçiləri və mülki şəxslərinə baş çəkib.
BQXK-nın Bakı ofisinin yayım şöbəsinin rəhbəri İlahə Hüseynova cümə axşamı Trend-ə bildirib ki, komitənin əməkdaşları martın 30-da Azərbaycanda saxlanılan 3 nəfər erməni əsirinə və bir ailənin 5 üzvünə baş çəkib.
Onların saxlanma şəraiti, vəziyyətləri ilə maraqlanıblar.
Başçəkmənin təfərrüatları barədə ətraflı məlumat verilmir.
Azərbaycanda hazırda 3 erməni hərbi əsir, bir ailənin 5 üzvü saxlanılır.
Martın 17-də tərəflər arasında əldə olunanrazılığa görə, Ağdam rayonunda BQXK-nin vasitəçiliyi ilə Azərbaycan erməni tərəfə mülki şəxs Artur Badalyanı təhvil verib. Əsirlikdə olan azərbaycanlı hərbi qulluqçu Anar Hacıyev isə Azərbaycana qaytarılıb.
Ermənistanın silahlı qüvvələri tərəfindən 27 avqust 2010-cu il tarixdə Azərbaycan Ordusunun kiçik çavuşu Roman Hüseynov, 10 may 2009-cu il tarixdə kiçik çavuş Anar Hacıyev əsir götürülüb.
Bir müddət öncə isə Azərbaycan əsirlikdə olan 3 erməni hərbçisini onların razılığı ilə üçüncü ölkəyə göndərib.
Cenevrə konvensiyalarına əsasən, fəaliyyət göstərən BQXK Azərbaycanda və Ermənistanda Dağlıq Qarabağ münaqişəsi ilə əlaqədar 1992-ci ildən etibarən işləyir.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Təhlükəsizlik Şurasının Dağlıq Qarabağ və ətraf rayonların azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.