İyulun 15-də saat 20:30-da Ermənistan Müdafiə Nazirliyinin H sayhlı hərbi hissəsində müddətli həqiqi hərbi xidmət keçən hərbi qulluqçu Xaçatur Qraçikoviç Tadevosyan (1988-ci il təvəllüdlü) döyüş mövqeyində silahla ehtiyatsız davranaraq avtomat silahdan atəş açıb və xidmət yoldaşı Kolya Ovannesovikç Mesropyanı (1992-ci il) öldürüb. Bu barədə "Armenia Today" xəbər verir.
Yenə iyulun 15-də, saat 16:30-da Azərbaycanın işğal olunmuş ərazisində naməlum şəraitdə Ermənistan ordusunun hərbi qulluqçusu Arutyunyan Andrey Alekseyeviç (1977-ci il) həlak olub.
İnsidentin təfərrüatları dəqiqləşdirilir.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Təhlükəsizlik Şurasının Dağlıq Qarabağ və ətraf rayonların azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.