Azərbaycan, Bakı, 28 noyabr /Trend, müxbir A.Axundov/
Cənubi Qafqazda parlament və prezident seçkiləri regiondakı vəziyyətə təsir etməyəcək. Bu barədə bazar ertəsi Trend-ə Xəzər regionu və Mərkəzi Asiya ölkələri üzrə ekspert, Azad Berlin Universitetinin əməkdaşı Bəhruz Əbdülvənd deyib.
"Hesab etmirəm ki, hər hansı bir böyük dəyişiklik olacaq. Düşünmürəm ki, bu ölkələrdə siyasi vəziyyətin dəyişməsi ilə regionda nə isə dəyişəcək", - o bildirib.
Ekspertin fikrincə, Dağlıq Qarabağ münaqişəsi üzrə ATƏT-in Minsk qrupu bu günə qədər heç nəyi dəyişə bilməyib.
"Fikrimcə, bu yaxşı siyasi klubdur, lakin bu təşkilat Azərbaycan və Ermənistan münasibətlərinin dəyişməsi üçün heç nə edə bilmir. Zənnimcə, Dağlıq Qarabağ münaqişəsinin siyasi həlli Moskvadadır, sonra isə Bakı və Yerevandadır. Reallıq budur ki, Moskva münaqişədə böyük rol oynayır", - Əbdülvənd deyib.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Təhlükəsizlik Şurasının Dağlıq Qarabağ və ətraf rayonların azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.