Azərbaycan, Bakı, 23 yanvar /Trend müxbir M.Əliyev/
İslam Əməkdaşlıq Təşkilatına üzv dövlətlərin Parlamentlər İttifaqının (İƏT Pİ) Sudanın paytaxtı Xartum şəhərində keçirilən 8-ci sessiyası zamanı Xocalı faciəsinin soyqırım kimi tanınması ilə bağlı qətnamə qəbul olunub. Trend-in məlumatına görə, bu barədə çərşənbə günü Dialoq və Əməkdaşlıq uğrunda İslam Konfransı Gənclər Forumunun (DƏ-İKGF) İstanbulda yerləşən Baş Qərargahından bildirilib.
DƏ-İKGF tərəfindən təqdim olunan layihə əsasında "İƏT Pİ və DƏ-İKGF arasında əməkdaşlıq" başlığı altında qəbul olunmuş qətnamənin "Xocalıya Ədalət!" kampaniyasına həsr edilmiş paraqrafında İƏT-ə üzv 51 ölkənin parlamentlərini öz sıralarında birləşdirən İƏT Pİ Xocalı faciəsini erməni silahlı qüvvələri tərəfindən dinc Azərbaycanlı əhaliyə qarşı törədilmiş soyqırım aktı kimi tanıyıb və faciəni insanlığa qarşı cinayət törədilmiş adlandırıb. Faciəni törədənlərin hüquqi məsuliyyətə cəlb olunmasını tələb edən İƏT Pİ, həmçinin DƏ-İKGF-nin Mədəniyyətlərarası Dialoq üzrə Baş koordinatoru Leyla Əliyevanın təşəbbüsü ilə irəli sürülmüş "Xocalıya Ədalət" beynəlxalq məlumat və təşviqat kampaniyasının vacibliyini qeyd edib, o cümlədən İƏT Pİ-yə üzv parlamentlərdə hadisəyə müvafiq hüquqi və siyasi qiymətin verilməsi və kampaniyaya dəstək göstərilməsi çağırışını edib.
Sənəd üzv parlamentlərin sədrlərinin və millət vəkillərinin iştirakı ilə yekdilliklə qəbul edilib. Xatırladaq ki, daha öncə 2012-ci ilin noyabr ayında Cibutidə keçirilən İƏT Xarici İşlər Nazirləri Şurasının 39-cu sessiyasında DƏ-İKGF-nin irəli sürdüyü qətnamə əsasında 57 İƏT üzvü ölkələrin xarici işlər nazirləri Xocalı faciəsini soyqırım aktı kimi tanıyıb və faciəni insanlığa qarşı törədilmiş cinayət adlandırıb.
Məqalə müəllifi ilə əlaqə ünvanı news@trend.az
Bizi Twitter-dən izləyin @trend_az
Trend-in ən mühüm və maraqlı xəbərlərini "Telegram"da izləyin
.jpg)
