Avropa Şurası Parlament Assambleyasının (AŞPA) Dağlıq Qarabağ münaqişəsi üzrə alt komitəsinin növbəti iclası dekabrın 14-nə planlaşdırılıb.
Trend in məlumatına əsasən, bu barədə AŞPA-da Azərbaycan nümayəndə heyətinin başçısı Səməd Seyidov alt komitənin Parisdə keçirilmiş II iclasının yekunlarına nəzərən bildirib.
Onun sözlərinə görə, müzakirələr obyektiv xarakter daşıyırdı və fərqləndirici cəhət o idi ki, bu dəfə çıxış edənlər daha çox tarixi faktlara yox, münaqişənin beynəlxalq hüquq normaları əsasında nizama salınması yollarının axtarışına üstünlük verirdi.
İclasın ən mühüm nailiyyətlərindən biri də AŞPA-nın yanvar sessiyasında qəbul ediləcək qərarların fəal müzakirəsinə dair qərarın qəbul edilməsi və bütünlükdə sessiyaların hər birində məsələnin baxılması oldu.
Sonra AŞPA-nın payız sessiyasında - oktyabrda Azərbaycan və Ermənistan nümayəndə heyətlərinin görüşü barədə qərar qəbul edildi.