Azərbaycan, Bakı, 15 aprel / Trend , müxbir Q.Cəbiyev/ Müsavat partiyası yerləşdiyi qərargahdan çıxarılmayacaq. Bu barədə çərşənbə axşamı Trend a Dövlət Əmlakının İdarə Edilməsi üzrə Dövlət Komitəsinin mətbuat xidmətinin rəhbəri Qulu Xəlilov məlumat verib.
Mətbuatda 8-ci mikrorayon yaşayış massivində yerləşən 2 saylı Evtikmə Kombinatına (ETK) məxsus ərazinin bölüşdürülərək özəlləşdirildiyi barədə informasiyalar yayılıb. 2 saylı ETK-nın inzibati binasında Müsavat Partiyası və "Yeni Müsavat" qəzetinin redaksiyası yerləşir.
Xəlilov deyib ki, Nazirlər Kabinetinin qərarı ilə Evtikmə Kombinatına məxsus ərazinin 3 hektarı "Qaçqınkom"un sərəncamına verilib. Qalan hissədə Evtikmə Kombinatının bazasında "Bakı İnşaat-2" adlı Səhmdar Cəmiyyəti yaradılıb. Səhmdar Cəmiyyətin özəlləşdirilməsi istiqamətində də qanunvericilikdə nəzərdə tutulmuş tədbirlər həyata keçirilir. "Müsavat Partiyası və redaksiyanın da yerləşdiyi binada ümumiyyətlə özəlləşmə həyata keçirilmir. Bu istiqamətdə yaradılan səs-küylər əsassızdır. Müsavat əvvəlki qaydada icarə haqqını ödəməklə fəaliyyətini davam etdirə bilər", - deyə o əlavə edib.
Müxalifəti təmsil edən Müsavat Partiyası 1992-ci ildə yaradılıb. Partiyanın başqanı İsa Qəmbər Azərbaycan Parlamentinin eks-spikeri (1992-93-cü illərdə) və 2003-cü ildə keçirilmiş prezident seçkisində prezidentliyə namizəd olub. Partiya beş nəfər deputatla Parlamentdə təmsil olunur.