Azərbaycan, Bakı, 18 aprel / ", müxbir S.İlhamqızı/ Klassik Xalq Cəbhəsi Partiyasında hesab edirlər ki, builki prezident seçkisində müxalifətin 50 faiz səs toplamaq imkanı yoxdur.
"Müxalifətçi prezidentliyə iddialıların təkbaşına seçkidə səslərin əksəriyyətini toplamaq gücü yoxdur" cümə axşamı KXCP sədri Mirmahmud Mirəlioğlu Trend a bildirib.
Müxalifətçi Müsavat Partiyasının başqanı İsa Qəmbər ötən həftə bəyan edib ki, builki prezident seçkisində 20-25 faiz səs toplamayan namizədlər siyasətdən getmək barədə düşünməlidirlər. Müsavat Partiyasında isə hesab edirlər ki, Qəmbər seçkidə səslərin 50 faizdən çoxunu toplayacaq: "Biz inanırıq ki, İsa Qəmbər seçkidə qalib gələcək, ona görə də onun siyasətdən getməsi barədə düşünmürük"-deyə Müsavatın mərkəzi icra aparatının rəhbəri Arif Hacılı Trend a açıqlamasında bildirib.
Mirəlioğlunun sözlərinə görə, KXCP-nin Azərbaycanın bütün bölgələrində, həmçinin seçki məntəqələrinin olduğu bütün ərazilərdə yerli təşkilatları, nümayəndələri var və partiya rəhbərliyi onlarla sıx işləyir. Mirəlioğlu bildirib ki, Müsavat da daxil olmaqla heç bir müxalifət partiyası bu məsələdə KXCP ilə müqayisəyə gələ və ondan üstün ola bilməz.
"Siyasətdən getməyə gəldikdə isə şəxsən mən lazım olan vaxtda heç bir bəyanat vermədən və heç kimdən icazə istəmədən bunu edəcəm"-deyə Mirəlioğlu bildirib.
2006-cı ilin mart ayında Klassik Xalq Cəbhəsi Partiyasının təsis qurultayı keçirilib. Həmin vaxta qədər partiya Azərbaycan Xalq Cəbhəsi Partiyası adına iddia edirdi və "Klassiklər" AXCP-si kimi tanınırdı. Azərbaycanın eks-prezidenti, AXCP-nin sədri Əbülfəz Elçibəyin müavini olmuş Mirmahmud Mirəlioğlu 2000-ci ildə partiyanın iki yerə parçalanmasından sonra "Klassiklər" qanadına sədrlik edib. 2006-cı ildə partiyanın adında dəyişiklik edilərək KXCP adlandırılıb.
Məqalə müəllifi ilə əlaqə ünvanı: [email protected]