Azərbaycan, Bakı,13 may / Trend , müxbir S.İlhamqızı, R.Hafizoğlu/ İraqın şimalındakı Kürd Administrasiyasının lideri Məsud Bərzaninin PKK terror təşkilatına dəstək verməməsi haqda açıqlaması səmimi qəbul olunmur. "Bərzaninin açıqlaması, sadəcə, diplomatik davranış xarakteri daşıyır"-deyə, İraqlı müstəqil politoloq Saleh Kəəbi Trend -a bildirib.
İraqın şimalındakı Kürd Administrasiyasının rəhbəri, Kürdüstan Demokrat Partiyasının lideri Məsud Bərzani iki gün əvvəlki açıqlamasında "Kürdlər üçün savaş dövrü artıq geridə qalıb. Kürd idarəetməsi PKK-ya qarşı mübarizədə tərəf olmayacaq" - deyib. Bu haqda məlumatı bazar ertəsi Türkiyə mətbuatı yayıb.
"Region kürdləri PKK terror təşkilatınıa silahla və maddi kömək göstərməsə də, onların bu təşkilata rəğbəti var" - deyə Kəəbi çərşənbə axşamı Bağdaddan telefonla bildirib. O hesab edir ki, İraq kürdləri regionda müstəqil kürd dövlətinin qurulmasına çalışırlar, çünki Kürdüstan dövlətinin yaranması kürdlərin ümumi maraqlarına xidmət edir.
Bərzaninin PKK-ya açıq şəkildə dəstək verməsi, politoloqun fikrincə, qeyri-mümkündür. "Dünyanın terrorçu təşkilat kimi tanıdığı PKK-ya rəsmi şəxslərin dəstək verməsi onların nüfuzuna, siyasi karyeralarına zərbə ola bilər", - deyə Kəəbi qeyd edib.
"Rəsmi Kürd Administrasiyasının PKK-ya silahlı dəstək verməməsi həm də region dövlətlərin və beynəlxalq qurumların təzyiqindən çəkinməsi ilə bağlıdır" - deyə, ekspert qeyd edib.
Türkiyəli politoloq Şanlı Bahadır Koç isə, hesab edir ki, Bərzaninin PKK kürdlərinə yönələn bu açıqlaması rəsmi Ankara üçün yetərli deyil.
"Türkiyə tərəfi Bərzaninin səmimiliyinə şübhə ilə yanaşa bilər. Çünki Bərzani PKK məsələsində Türkiyənin onunla işləməsi, danışıqlar aparması üçün bu təşkilatdan istifadə edib" - deyə, Koç çərşənbə axşamı Ankaradan Trend - a telefonla bildirib.
Onun fikrincə, Bərzaninin Türkiyəyə münasibətində yumşalmalar var. Politoloq xatırladıb ki, Türkiyənin İraqın şimalında PKK-ya qarşı hərbi əməliyyatlara başlamaq üçün dörd il gözləməsinin səbəbi Amerikanın, İraqın, dünya birliyinin müxtəlif bəhanələrlə baş qatması olub. Nəhayət, İraq sərhəd "toxunulmazlığını" itirdi : "Bərzani də görür ki, əvvəllər yalnız bəyanatlarla kifayətlənən Türkiyə artıq öz qərarlarını reallaşdırır, manevrlər edə bilir" - deyə ekspert qeyd edib.
Koç əmindir ki,Türkiyə PKK terror təşkilatına qarşı mübarizəni Bərzaniyə həvalə etmir. "Bərzani bu təşkilatın zərərsizləşdirilməsi üçün bütün lazımi addımları atmaya bilər, amma hər hansı bir bölgənin başçısı olmağın öz məsuliyyəti, öhdəlikləri var" - deyə türkiyəli ekspert bildirib.
PKK (Kürd Fəhlə Partiyası) fəallları 1984-cü ildən etibarən Türkiyənin cənub-qərbində müstəqil kürd dövlətinin qurulması üçün silahlı mübarizə aparırlar. KİV-in verdiyi məlumata görə, toqquşmalar nəticəsində bu günədək ölənlərin sayı 37 min nəfəri keçib.
Türkiyə və beynəlxalq təşkilatlar PKK-nı terrorçu təşkilat kimi tanıyıb. Türkiyə PKK-nı zərərsizləşdirmək üçün 2008-ci ilin əvvəlindən başlayaraq, İraqın şimalında hərbi əməliyyatlar aparır.
Məqalənin müəllifi ilə [email protected] ünvanı ilə əlaqə saxlaya bilərsiniz.
