Azərbaycan, Bakı, 09 iyun/ Tr , müxbir E.Babayev/ Azərbaycan parlamenti tərəfindən Seçki Məcəlləsinə edilən əlavə və dəyişikliklər hakim Yeni Azərbaycan Partiyasının (YAP) seçki ilə bağlı planlarını dəyişib. "Dəyişikliklərdən sonra YAP-ın şəhər və rayon təşkilatları seçki kampaniyasının daha çevik və dinamik aparılması üçün çox ciddi çalışmalıdırlar", - deyə Səbail rayon İcra Hakimiyyətinin akt zalında prezident seçkilərinə hazırlıqla əlaqədar keçirilən YAP-ın şəhər və rayon təşkilatları sədrlərinin ümumrespublika müşavirəsində hakim partiyanın sədr müavini və icra katibi Əli Əhmədov bildirib.
Trend -un arayışı: İyunun 2-də Milli Məclisin qərarı ilə Seçki Məcəlləsində bir sıra dəyişikliklər edilib. Təbliğat kampaniyasının müddəti 120 gündən 75 günə endirilib. 75 günün 28-i təşviqat işlərinə, qalan günlər isə namizədin müəyyən edilməsi, onun qeydə alınması üçün imzaların toplanması, imzaların Mərkəzi Seçki Komissiyası tərəfindən yoxlanılması və digər prosedur tədbirlərinə sərf olunacaq. Bundan başqa, namizədin dəstəklənməsi üçün lazım olan imzaların sayı əvvəllər olduğu kimi 45 min yox, 40 min müəyyən edilib, dövlət KİV-də seçki təbliğatı qadağan olunub.
Azərbaycanda prezident seçkisi oktyabrın 15-də keçiriləcək. İndiyə qədər Müsavat Partiyasının başqanı İsa Qəmbərin, ADP sədri Sərdar Cəlaloğlunun, Yaşıllar Partiyasının sədri Mais Güləliyevin namizədliyi təmsil olunduqları partiyalar tərəfindən irəli sürülüb. Bundan başqa, Azərbaycan Naminə İctimai Forumun rəhbəri Eldar Namazov müstəqil şəkildə namizədliyini irəli sürüb. Hakim Yeni Azərbaycan Partiyası isə hazırki dövlət başçısı İlham Əliyevin namizədliyini irəli sürmək niyyətindədir. Üç müxalifət partiyasının (Xalq Cəbhəsi, Vətəndaş və İnkişaf, Liberal) təmsil olunduğu "Azadlıq" bloku isə seçkiləri boykot edəcəyi barədə bəyanat verib.
YAP sədrinin müavini müşavirədə deyib ki, prezident seçkilərinə hazırlıq işlərinə partiya tərəfindən artıq start verilib. "Prezident seçkilərində irəli sürülmüş namizədin kimliyi əsas məsələdir. Bu seçkilərdə partiya tərəfindən dəstəklənəcək namizəd - dövlət başçısı və YAP-ın sədri İlham Əliyev cəmiyyətdə çox yüksək nüfuza malikdir. YAP tərəfindən məhz İlham Əliyevin prezidentliyə namizədliyinin irəli sürülməsi budəfəki seçkilərin də partiyamız üçün uğurlu olacağına ən etibarlı təminat verir. Azərbaycanda həm yerli, həm də beynəlxalq təşkilatları təmsil edən mütəxəssislərin iştirakı ilə keçirilmiş sosioloji sorğuların nəticələri də İlham Əliyevin seçicilər arasında yüksək reytinqə malik olduğunu təsdiq edib", - deyən Əhmədov bildirib ki, bu gün bütün sahələrdə inkişaf tempinə görə Azərbaycan bütün dünyanın diqqət mərkəzindədir.
Müşavirədə prezident seçkisi ilə əlaqədar partiya rəhbərliyi tərəfindən xüsusi konsepsiyanın və bu konsepsiyanın həyata keçirilməsi üçün iş planının hazırlandığı diqqətə çatdırılıb. Qeyd edilib ki, həmin konsepsiya həm bütün ölkə, həm də YAP üçün əlamətdar hadisə olacaq prezident seçkilərinin ədalətli, demokratik, şəffaf və qanunauyğun keçirilməsi məqsədi ilə partiyanın bütün resurslarından, yüz minlərlə partiya fəalının potensialından səmərəli və çevik istifadə edilməsini nəzərdə tutur.
Müşavirədə o da bildirilib ki, seçkilər ərəfəsində partiyanın rayon və şəhər təşkilatlarının konfranslarının və qurultayının keçirilməsi nəzərdə tutulur.
YAP 1992-ci ildə o vaxt Naxçıvan Ali Məclisinin sədri olan Heydər Əliyev tərəfindən yaradılıb. Azərbaycanda 15 ildən artıqdır hakim partiya olan YAP-ın indiki sədri prezident İlham Əliyevdir.
Məqalə müəllifi ilə əlaqə ünvanı: [email protected]
