Azərbaycan, Bakı, 09 iyul / Trend , müxbir D.Xatınoğlu/ Əfqanıstanın Pakistanla diplomatik əlaqələrinin yaxşılaşması rəsmi İslamabadın "Taliban" və "Əl-Qaidə" şəbəkəsinə qarşı ciddi tədbir görməsindən asılıdır.
"Pakistan Əfqanıstanı razı salmaq üçün terrorizmlə mübarizədə əməli addımlar atmalıdır"- deyə, Əfqanıstanın Xarici İşlər Nazirliyinin mətbuat katibi Sultan Əhməd Behin (Soltan Ahmad) Trend -a bildirib.
İyunun 6 -da Hindistanın Əfqanıstandakı səfirliyinin qarşısında partlayış baş verib. Əfqanıstan mətbuatının məlumatına əsasən, partlayışda 5 hindli, 44 əfqan həlak olub. Hökumət sözçüsü Humayun Həmidzadə keçirdiyi mətbuat konfransında dolayısıyla Pakistanın xəfiyyə orqanlarının bu hadisədə əli olduğunu bildirib. Pakistan Baş naziri Yusif Rza Gilani (Yusef Reza Gilani) isə, bu ittihamları rədd edərək, rəsmi İslamabadın hadisədən xəbərsiz olduğunu bildirib.
"Əfqanıstan Pakistan hakimiyyətinin və hakim Xalq Partiyasının demokratik bir hökümət olduğuna əmindir. Lakin Pakistan tərəfi Əfqanıstanın təhlükəsizliyinə görə üzərinə düşən bəzi öhdəliklərə əməl etmir"-deyə, Əfqanıtsanın XİN nümayəndəsi Behin çərşənbə günü telefonla Kabildən bildirib.
Onun sözlərinə görə, "Əl-Qaidə" və "Taliban" təşkilatı Pakistanın sərhəd bölgələrində fəaliyyət göstərir, Pakistan isə, bu terror şəbəkələrinin qərargahlarının məhv edilməsi üçün Əfqanıstanla əməkdaşlıq etmir. "Digər tərəfdən, Pakistan demokratik ölkədir, buna görə də hərbi qüvvələr və xəfiyyə orqanları hakimiyyətin tam nəzarəti altında olmalıdır. Bu orqanlarda bəzi vəzifəli şəxslər ya terrorçuları himayə edirlər, ya da onların fəaliyyətinin qarşısını almağa maraq gstərmirlər" - deyə, Behin bildirib.
Onun fikrincə, Pakistanda bəzi vəzifəlilər hələ də düşünürlər ki, terrorizmə dəstək verməklə və Əfqanıstanda sabitliyi pozmaqla, bu ölkədə öz nüfuzlarını artıra bilərlər. "Bu cür yanaşmanı aradan qaldırmaq şərti ilə, biz Pakistanla əlaqələrimizi genişləndirməyə çalışa bilərik" - deyən Behin əlavə edib ki, Hindistanın Əfqanıstandakı səfirliyinin qarşısında partlayış baş verməsinə baxmayaraq, hər iki ölkə diplomatik əlaqələrini və əməkdaşlığını davam etdirməyə və genişləndirməyə çalışır.
"Biz fikirləşmirik ki, bu partlayışı Pakistanın təhlükəsislik orqanları törədib. Bu partlayiş bir qrup islam fundamentalistləri tərəfindən həyata keçirilib" - deyə, Pakistan eksperti Farooq Tariq Trend -a bildirib.
Onun fikrincə, Hindistanın Kabildəki səfirliyində baş vermiş partlayış Pakistan - Əfqanıstan münasibətlərinə təsir etməyəcək. "Lakin Pakistandakı fundamentalistlərin fəaliyyəti getdikcə iki ölkə arasındakı münasibətləri pozur" - deyə, Tariq çərşənbə günü İslamabaddan telefonla bildirib.
Hazırda heç bir qrup sözügedən partlayışla bağlı məsuliyyəti öz boynuna götürməyib.
Pakistan 1947- ci ildə, Hindistan ayrılandan, hər iki ölkənin Kəşmir regionu üzərində torpaq iddiası olduğuna görə, aralarında gərgin münasibət var. Rəsmi İslamabadın 1997- ci ildə hakimiyyətdə olan Talibanla geniş münasibəti var idi. Eyni zamanda, Hindistan Talibanın devirdiyi Şah Əhməd Məsudun tərəfdarı idi. Hazırda Hindistan Əfqanıstanda böyük nüfuza malikdir və bir sıra sahələrdə rəsmi Kabil ilə geniş əməkdaşlıq edir. Həmidzadə mətbuat konfransında verdiyi bəyanatda bildirib ki, Hindistan səfirliyində baş verən partlayış tamamilə Pakistan təhlükəsizlik orqanlarının bundan əvvəl Əfqanıstanda keçirdiyi əməliyyata bənzəyir.
