Azərbaycan, Bakı, 15 iyul/ Trend , müxbir E.Babayev/ Üç müxalifət partiyasının (Xalq Cəbhəsi, Vətəndaş və İnkişaf, Liberal) təmsil olunduğu "Azadlıq" blokunun seçkilərlə bağlı Məclisinin iclası baş tutmaya bilər. "Əgər Məclisin iclasını keçirə bilməsək, başqa variantdan istifadə olunacaq. Yəni toplaşmadan və müzakirələr aparmadan Məclis üzvləri arasında boykot qərarı ilə bağlı səsvermə keçiriləcək", bunu çərşənbə axşamı Trend -a Vətəndaş və İnkişaf Partiyasının (VİP) sədri Əli Əliyev deyib.
Trend -un arayışı: Azərbaycanda prezident seçkisinin oktyabrın 15-də keçirilməsi nəzərdə tutulur. "Azadlıq" blokunun Sədrlər Şurası may ayının sonunda seçkiləri boykot edəcəyi barədə bəyanat verib. Blokun Məclisində bu bəyanatın müzakirəyə çıxarılıb, yekun qərar verilməsi nəzərdə tutulur. Blokun Məclisi ötən həftənin şənbə günü Beynəlxalq Mətbuat Mərkəzində keçirilməli idi. Lakin BMM təmirə dayandığından Məclisin toplantısı baş tutmayıb. İndi blok Məclisi keçirmək üçün başqa yer axtarır.
Əliyev vurğulayıb ki, əgər yaxın vaxtlarda yer tapılmasa, Məclis üzvləri arasında səsvermə keçirilməsi metodundan istifadə olunacaq. "Blokun Məclisi 60 nəfərdən ibarətdir. Yəni hər partiyadan 20 nəfər Məclisdə təmsil olunur. Yer tapılmasa, iclas keçirmədən onlar arasında səsvermə keçirilərək, boykot bəyanatına münasibət öyrəniləcək və qərarımız rəsmiləşəcək", - deyə o əlavə edib.
VİP 2006-cı ildə təsis olunub. Həmin vaxta qədər bu partiyanın üzvləri Azərbayan Milli İstiqlal Partiyasında (AMİP) təmsil olunublar. AMİP-də baş vermiş parçalanma nəticəsində Əli Əliyevin tərəfdarlı öz qurultaylarını keçirərək VİP-i təsis ediblər. VİP "Azadlıq" siyasi blokunun üzvüdür.
Məqalə müəllifi ilə əlaqə ünvanı: [email protected]